Կոտայքի մարզի ընդհանուր իրավասության դատարանի Աբովյանի նստավայրում դերասան Վարդան Պետրոսյանի ֆրանսիացի պաշտպան Մարի Դոզեն միջնորդեց փոփոխել իր պաշտպանյալի նկատմամբ ընտրված խափանման միջոց կալանավորումը:
Դատախազ Արթուր Սարգսյանը նշեց, որ ինքը դեռևս կասկած ունի, որ կալանքը փոխելու դեպքում Վարդան Պետրոսյանը փախուստի կդիմի, ճնշում կգործադրի վկաների վրա: Ուստի միջնորդեց մերժել պաշտպանի միջնորդությունը:
Տուժողների և տուժողների իրավահաջորդների ներկայացուցիչ Ռուբեն Բալոյանը նշեց, որ ինքը այդպես էլ չհասկացավ, թե Մարի Դոզեի ելույթն առարկություն էր, միջնորդություն էր, թե պաշտպանական ճառ: «Ես կասեի, որ բարոյական բնույթի հորդոր էր և դաստիարակչական բնույթ էր կրում»,- նշեց Ռուբեն Բալոյանը:
Տուժող կողմի պաշտպանները դատարանին խնդրեցին մերժել միջնորդությունը, քանի որ ազատության մեջ լինելով՝ Վարդան Պետրոսյանը կխոչընդոտի դատաքննությանը:
Ամբաստանյալ Վարդան Պետրոսյանը նշեց, որ առաջին անգամ է լսում, թե իրականում ինչու են իրեն կալանքի տակ պահում: «Ես փախչող մարդ չեմ»,- դատախազին պատասխանեց Վարդան Պետրոսյանը:
Դատավոր Վաղինակ Մկրտչյանը հեռացավ խորհրդակցական սենյակ որոշում կայացնելու:
Ամբաստանյալ Վարդան Պետրոսյանի ֆրանսիացի պաշտպանի ելույթը՝ առաջիկայում:
