Երևանի ընդհանուր իրավասության դատարանի Ավանի նստավայրում այսօր՝ հոկտեմբերի 28-ին, դատավոր Դավիթ Հարությունյանի նախագահությամբ, տեղի ունեցավ Վազգեն Սարգսյանի  անվան ռազմական ինստիտուտի կուրսանտ Հայկազ Բարսեղյանի սպանության գործով հերթական դատական նիստը:

Նիստի ընթացքում պաշտպանական կողմը միջնորդություն ներկայացրեց անբաստանյալ Գնել Թևոսյանի կողմից օգտագործված ածելու շեղբի վրա հայտնաբերված արյան նոր դատագենետիկական փորձաքննություն նշանակել, որով, ենթադրվում է, վերջինս կտրել է Հայկազ  Բարսեղյանի ձեռքի երակը: Առաջարկվել է նաև նոր փորձաքննության ենթարկել  կուրսանտների քուղերով պատրաստված օղակը, որը հայտնաբերել են զոհի պարանոցին:

«Փորձաքննությամբ կարող են նոր հանգամանքներ առաջ գալ և պարզ կդառա, թե ինչ հանգամանքներում է վրա հասել Հայկազ Բարսեղյանի մահը: Հնարավոր է նաև պարզվի, որ քուղերով պատրաստված օղի վրա կան այլ անձանց մատնահետքեր, և նույնիսկ Հայկազ Բարսեղյանինը»,- նշեց ամբաստանյալ Գնել Թևոսյանի պաշտպան Արա Զաքարյանը:

Մեղադրող կողմը առարկեց միջնորդությանը նշելով, որ դա ավելորդ ռեսուրսների և ժամանակի ծախս կլինի, քանի որ արդեն իսկ ապացուցվել է, որ  Գնել Թևոսյանի ,Վաչե Սահակյանի մատնահետքերը  առկա են ածելու շեղբի վրա  և այն  ապացուցում է, որ Հայկազ Բարսեղյանը  ինքնասպան չի եղել:

«Նախորդ փորձաքննություներով արդեն ապացուցվել է  որ քուղերը եղել են ամբաստանյալների մոտ և չենք կարող բացառել, որ եթե նույնիսկ Հայկազ Բարսեղյանի մատնահետքերն էլ հայտաբերվեն, դրանք կարող են հայտնված  լինել դիմադրության հետևանքով»,- ասաց տուժողի իրավահաջորդի ներկայացուցիչը:

 Դատարանը 30 րոպե խորհրդակցական սենյակում անցկացնելուց հետո հրապարակեց որոշումը, որով բավարարեց պաշտպանական կողմի միջնորդությունը՝ նոր փորձաքննության նշանակման վերաբերյալ:

Դատական նիստը հետաձգվեց:

Դիանա Հարությունյան