Կուրսանտ Հայկազ Բարսեղյանի սպանության գործով հերթական նիստն այսօր տեղի չունեցավ: Ավան և Նոր Նորք վարչական շրջանների ընդհանուր իրավասության դատարան չէին ներկայացել ամբաստանյալներից երկուսի իրավունքների պաշտպանները, նրանցից մեկը՝ փաստաբան Արա Զաքարյանը որևէ պատճառաբանություն չէր ներկայացրել դատարան:
Դատավոր Դավիթ Հարությունյանը նախ հայտարարեց 5 րոպե ընդմիջում, որպեսզի պարզի, թե արդյոք ներկայանալու է փաստաբանը: Ընդմիջումից հետո պարոն Հարությունյանը հաղորդեց, որ Արա Զաքարյանի հեռախոսահամարն անհասանելի է. «Փաստաբանի վարքագիծը պետ է գնահատել անհարգալից վերաբերմունք դատարանի նկատամամբ, դատավարության մասնակիցները պարտավոր են տեղյակ պահել դատարանին իրենց բացակայության մասին: Հաջորդ դատական նիստին, համապատասխան պարզաբանում լսելուց հետո, պետք է քննարկել նրա նկատմամբ սանկցիա կիրառելու հանգամանքը՝ հաշվի առնելով այն, որ փաստաբանը նիստին ներկա չլինելու մասին որևէ տեղեկություն չի հայտնել»,- նշեց դատավորը և ավարտեց հերթական նիստը:
Փաստաբան Արա Զաքարյան
Նիստից հետո տուժողի իրավահաջորդի ներկայացուցիչ Անի Թորոսյանը, Իրավաբան.net-ի հետ զրույցում անդրադարձավ ինքնասպանության վարկածին, նշելով, որ այն արդեն բացառված է, քանի որ դատաբժշկական փորձաքննություն կա, ըստ որի՝ կուրսանտի մահը վրա է հասել կախվելուց առաջ, նա նաև կարծում է, որ Հայկազի պահարանում թողնված գրությունը կուրսանտին չի պատկանում:
Խոսելով այն հանգամանքից, որ որոշ վկաներ հայտարարել են, թե ճնշման են ենթարկվել ռազմական ոստիկանությունում, փաստաբանն ասաց, որ այդ մասով դեռ քննություն կիրականացվի. «Անգամ ենթադրաբար ընդունելու դեպքում, որ եղել է ճնշում, ապա պետք է հասկանալ, թե արդյոք այդ ճնշման հետևանքով փոխվել է անձանց ցուցմունքների արժանահավատությունը»,- փոխանցեց մեր զրուցակիցը:
Հիշեցնենք, որ 2015թ. հունվարի 29-ին Վազգեն Սարգսյանի անվան ռազական ինստիտուտի կուրսանտ Հայկազ Բարսեղյանը վաղ առավոտյան հայտնաբերվել էր մարզահրապարակում` պտտաձողի վրա պարանով կախված վիճակում: Նրա սպանության մեջ մեղադրվում են նրա համակուրսեցիներ Գնել Թևոսյանը, Նորիկ Սահակյանը, Վաչե Սահակյանը, Մովսես Ազարյանը: Նրանց մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանություն:
Մանրամասները՝ տեսանյութում:
Գ.Թ.
