Ընտանիքում երեք քույր են եղել։ Հայրը երազ է տեսել, որ իրենց տանը տղա երեխա է լույս աշխարհ գալու ու անունն էլ՝ Նոյ։ Երազից մեկ ամիս չանցած պարզվում է, որ ընտանիքի մայրը հղի է ու 2001թ․-ի սեպտեմբերի 19-ին Թևոնյանների ընտանիքում ծնվում է Նոյը։
Նրանք երկար ժամանակ ապրել են Ռուսաստանի Դաշնությունում, սակայն Նոյը պնդել է, որ իր ապագան տեսնում է Հայաստանում ու եկել է հայրենիք՝ սովորելու, զինծառայություն անցնելու:
2020 թվականի հունվարի 19-ին Նոյը զորակոչվել է ծառայության:
Նոյի քույրը՝ Լիանան պատմում է, որ եղբայրը՝ տեսնելով ոստիկան հոր գրքույկը, փոքր ժամանակ իր մորը խնդրել է իր համար նմանատիպ գրքույկ պատրաստել: Խնդրել է մեջը գրել, որ նա պաշտպան է և հետախույզ։ Մայրիկին ասել է, որ գրքույկի վավերականության ժամկետը գրի 2020թ: Քույրը պատահականությունից ապշած ասում է, որ Նոյը կարծես մարգարեացել է:
Փոքր եղբոր մասին քույրերը խոսում են որպես անսահման բարության և մարդասիրության տեր մարդու․ «Նոյը պատերազմի օրերին զանգում ու ասում էր, որ գտնենք իր ծառայակիցների ծնողներին և հայտնենք, որ իրենց տղաները լավ են, ուղղակի կապ չկա»։
