ԱԺ պատգամավոր Թագուհի Թովմասյանը հայցադիմում է ներկայացրել ՔՊ-ական պատգամավոր Արթուր Հովհաննիսյանի դեմ։ Այս մասին Iravaban.net-ը տեղեկանում է «Դատալեքս» համակարգից։
Հայցադիմումը մուտքագրվել է երեկ՝ սեպտեմբերի 30-ին Երևանի ընդհանուր իրավասության քաղաքացիական դատարան և մակագրվել դատավոր Աննա Շիլաջյանին։
Ըստ հայցադիմումի՝ Թագուհի Թովմասյանը դատարանից պահանջում է.
- Պարտավորեցնել Արթուր Հովհաննիսյանին հրապարակային՝ տեսանյութի միջոցով ներողություն խնդրել «24 ՆՅՈՒԶ» և «5TV CHANNEL» լրատվական կայքերի միջոցով՝ հետևյալ արտահայտությունների համար.
- Թովմասյանին «անբարո» անվանելու
- «Թող ամեն օր սեռավարակի թեստ հանձնի, ու կհասկանանք չորս հատ տունը իրեն որտեղից» արտահայտության
- «Կին ա, թող իրան կնոջ պես պահի, թե չէ էդ թեստն էլ կդնեմ կասկածի տակ՝ իրա սեռային պատկանելիության» արտահայտության համար
- Պարտավորեցնել հերքելու Թովմասյանի վերաբերյալ զրպարտություն համարվող այն փաստացի տվյալները, թե նա «Հյուսիսային պողոտայում 4 հատ տուն է գնել՝ լինելով հասարակ լրագրող»
- Բռնագանձել ընդհանուր 9 միլիոն ՀՀ դրամ, որից՝
- 3 միլիոն դրամը՝ որպես վիրավորանքի համար ոչ նյութական վնասի փոխհատուցում
- 6 միլիոն դրամը՝ որպես զրպարտության համար ոչ նյութական վնասի փոխհատուցում
Համաձայն հայցադիմումի՝ Արթուր Հովհաննիսյանը, որը հանդիսանում է ՀՀ Ազգային ժողովի ութերորդ գումարման պատգամավոր և «Իմ քայլը» խմբակցության քարտուղար, 2025 թվականի սեպտեմբերի 8-ին Ազգային ժողովում լրագրողների հետ ճեպազրույցի ժամանակ վիրավորական արտահայտություններ է հնչեցրել և զրպարտչական հայտարարություններ արել ընդդիմադիր պատգամավոր Թագուհի Թովմասյանի հասցեին:
Թագուհի Թովմասյանի շահերը դատարանում ներկայացնում է փաստաբան Լուիզա Հովհաննիսյանը:
