Երբևէ լսե՞լ եք, որ մարդը մանկությունից ծառայի հանուն հայրենիքի։ Երկրապահ կամավորականների միության անդամ Հայկ Թադևոսյանը իր մանկությունը, պատանեկությունն ու կյանքը նվիրել է Հայաստանին ու Արցախին։

Մայրը՝ Լարիսա Խուդավերդյանը, Iravaban.net-ի «Հանուն հայրենիքի» շարքի շրջանակում հիշում է, որ որդին դեռ երեխա էր, երբ փախչում էր տանից և գնում Արցախ։ Հայրենիքի սահմաններով մտահոգված Հայկը փոքր տարիքում կազմակերպում էր հին անվադողերը՝ սահմանային գոտին ամրացնելու համար։ Առաջին պատերազմից մինչև 2020 թվականի 44-օրյա պատերազմ, Հայկը եղել է կամավոր։

«Աշխույժ տղա էր, հայրենասեր, նվիրված հայրենիքին։ Այս տարածքում (Առինջ-խմբ․) բնակչություն գրեթե չկար, վերևում զինվորական զորամաս էր։ Զինվորականները գալիս էին, միակ ծորակը մեր բակում էր, ջուր էին տանում։ Գործից գալիս էի, տեսնում՝ մի օր ծածկոցը չկա, մի օր՝ ղավուրման, ասում էի՝ Հայկ, ուր է, ասում էր՝ զինվորները սառած էին, տվել եմ իրենց։ Տասը տարեկան էր, երբ գեներատորներ էր հայթհայթել սահմանի համար։ Ասացի՝ մեկը թող մեզ, ասաց՝ ի՞նչ ես խոսում, Արցախում ժողովուրդը լույս չունի, տալու եմ զորամասին։ Մինչև Արցախյան շարժումն էլ էր փախչում, գնում Արցախ։ Ասում էր՝ մամա, դու մայր ես, մյուսների մայրերը մա՞ր չեն։ Հո չենք թողնի, որ գան մեր կանանց, երեխաներին, քույրերին վարկաբեկեն։ «Մոռացիր մորդ, մի մոռացիր հայրենիքիդ․ նա չմոռացավ հայրենիքը»,- նշում է մայրը։

Լարիսան նաև հիշում է, որ Հայկը դեռ մանկուց դեմ էր արտագնա աշխատանքին․ ասում էր՝ թող բոլորը գնան, ես կմնամ մենակ, կգնամ Ատոմակայանի լույսերը կմիացնեմ, որ երևա՝ բոլորը Հայաստանում են։

Առաջին պատերազմի ժամանակ Հայկը դեռ դպրոցահասակ էր, բայց մեկնել էր Արցախ։ Մի քանի օր տուն չէր եկել, իսկ երբ վերադարձել էր, միայն ասել էր, որ պատերազմը աննկարագրելի է։

Կինը՝ Լիանա Ապերյանը, պատմում է, որ ամուսինը հայրենասիրական ոգով դաստիարակել է իրենց երեք երեխաներին։

44-օրյա պատերազմին մասնակցել է Հադրութի մարտերին։ Զոհվել է հոկտեմբերի 10-ին՝ անօդաչու թռչող սարքի հարվածից։

Մանրամասները՝ տեսանյութում։