Իրավաբանների հայկական ասոցիացիան՝ Արցախից բռնի տեղահանված անձանց իրավունքների պաշտպանության ՔՀԿ-ների ցանցի հետ համագործակցությամբ, իրականացրել է Մարդու իրավունքների պաշտպանության ազգային ռազմավարությունից բխող 2023-2025 թթ. գործողությունների իրականացման ծրագրի 2023-2024 թթ. իրականացման ենթակա գործողությունների կատարման հասարակական մշտադիտարկում։

Այսօր՝ հունիսի 20-ին, տեղի է ունեցել զեկույցի շնորհանդեսը, որին մասնակցել են Արդարադատության նախարարի տեղակալ Աննա Կարապետյանը, Իրավաբանների հայկական ասոցիացիայի նախագահ Կարեն Զադոյանը, Արցախից բռնի տեղահանվածների իրավունքների պաշտպանության ՔՀԿ-ների ցանցի գլխավոր քարտուղար Կարեն Զադոյանը, նույն ցանցի կառավարման խորհրդի նախագահ Ջուլիետտա Առուստամյանը, ինչպես նաև ներկայացուցիչներ Մարդու իրավունքների պաշտպանի աշխատակազմից, Արդարադատության նախարարությունից և ԻՀԱ-ից։

Զեկույցի շնորհանդեսին բացման խոսքով հանդես եկավ Իրավաբանների հայկական ասոցիացիայի նախագահ, Արցախից բռնի տեղահանվածների իրավունքների պաշտպանության ՔՀԿ-ների ցանցի գլխավոր քարտուղար Կարեն Զադոյանը։

ԻՀԱ-ն կարևորում է ՀՀ-ում մարդու իրավունքների պաշտպանությունը, այդ ոլորտի քաղաքականության մշակումը և դրա բարելավումը, նշեց Կարեն Զադոյանը և հավելեց․ «Այդ պատճառով կատարում ենք այս աշխատանքները՝ կառուցողական ձևաչափով Արդարադատության նախարարության հետ համագործակցելով՝ փորձելով բարելավել ռազմավարությունը, վեր հանել խնդիրները, որպեսզի հաջորդ ռազմավարություններում նախատեսվեն ավելի առարկայական և իրատեսական գործողություններ»։

Ռազմավարությամբ նախատեսված 60 գործողություններից կատարվել է 24-ը, մասնակի՝ 26-ը, իսկ 10 գործողություն չի կատարվել։

Մանրամասները՝ տեսանյութում:

Արդարադատության փոխնախարար Աննա Կարապետյանը նշեց, որ ՄԻՊ ազգային ռազմավարության շրջանակներում գործողությունների ամբողջական համակարգումն իրականացնում է Արդարադատության նախարարությունը։

Փոխնախարարը շեշտեց, որ կան նախագծեր, որոնց ուսումնասիրությամբ անձամբ է զբաղվել, իսկ amicus curiae-ի վերաբերյալ քննարկումներ են անցկացվել նաև ԱԺ պատգամավորների և հասարակական կազմակերպությունների ներկայացուցիչների հետ․ «ԱԺ պատգամավորներն են ձեռնարկել համապատասխան նախագծի մշակումը, նրա ընթացակարգերը, և, հետևաբար, մենք ևս քննարկումներ ենք ունեցել նրանց հետ։ Նախագիծը դեռևս առաջ չի գնացել, և փաստացի ունենք մի քանի նախագծեր, որոնք այժմ քննարկման և մշակման փուլում են»։

Մանրամասները՝ տեսանյութում:

Արցախից բռնի տեղահանվածների իրավունքների պաշտպանության ՔՀԿ-ների ցանցի կառավարման խորհրդի նախագահ, «Հարմոնիա» Շուշեցի կանանց հասարակական կազմակերպության գործադիր տնօրեն Ջուլիետտա Առուստամյանը հույս հայտնեց, որ նման միջոցառումների իրականացումը կնպաստի արցախահայերի խնդիրների լուծմանը․ «Հույս ունեմ, որ ակտիվ քննարկում կունենանք, որի արդյունքում կմոտենանք արցախահայերի արդի խնդիրների լուծմանը»։

Մանրամասները՝ տեսանյութում:

Իրավաբանների հայկական ասոցիացիայի իրավական հարցերով փորձագետ Սյուզաննա Սողոմոնյանը ներկայացրեց 2023-2024 թվականների մշտադիտարկման արդյունքները։ Ռազմավարության շրջանակում առանձնացվել է 12 ոլորտ։

«Նշված ժամանակահատվածում իրականացվելիք գործողությունների թիվը 60-ն է։ Հասարակական մշտադիտարկման արդյունքում կազմվել է զեկույցի նախագիծ, որն ուղարկվել է ռազմավարության կատարող և համակատարող բոլոր պետական մարմիններին և այլ շահագրգիռ կառույցներին՝ նախագծի վերաբերյալ առաջարկներ ու դիտարկումներ ստանալու նպատակով», — նշել է Սյուզաննա Սողոմոնյանը։

Նրա խոսքով՝ ռազմավարությամբ նախատեսված 60 գործողություններից ամբողջությամբ կատարվել է 24-ը, մասնակի՝ 26-ը, չի կատարվել՝ 10-ը։

Մանրամասները՝ տեսանյութում:

«Օրենսդրական կարգավորումների բաց կա»․ ԻՀԱ իրավաբանը՝ ՄԻՊ ռազմավարության մոնիթորինգի արդյունքների մասին

Իրավաբանների հայկական ասոցիացիայի իրավաբան Մարիաննա Ավագյանն իր ելույթում անդրադարձավ կատարված մշտադիտարկման արդյունքներին՝ նշելով, որ մոնիթորինգի առաջին ոլորտը կյանքի իրավունքն է, որի շրջանակում նախատեսված է 2 հիմնական գործողություն։ Դրանք ուղղված են հետևյալին․

• Զինված ուժերում հանդուրժողականության և փոխադարձ հարգանքի մթնոլորտի ամրապնդում,
• Ազատությունից զրկված անձանց իրազեկվածության բարձրացում՝ կյանքի իրավունքի, խոշտանգումների և այլ դաժան, անմարդկային կամ նվաստացնող վերաբերմունքի վերաբերյալ։

Նշված նպատակներին հասնելու համար գործողությունների ծրագրով նախատեսվել էին՝ տեսաձայնագրությունների պատրաստում և հրապարակում, իրազեկող պաստառների տեղադրում, ինչպես նաև վերապատրաստումների իրականացում։

«Սակայն իրականացված մշտադիտարկման արդյունքում արձանագրել ենք, որ այս գործողությունները հիմնականում կենտրոնացած են քանակական արդյունքների ապահովման վրա՝ առանց որակական բաղադրիչի և ազդեցության գնահատման մեխանիզմների», – ասաց Մարիաննա Ավագյանը։

Մանրամասները՝ տեսանյութում:

Միջոցառմանը ներկա էին նաև Արդարադատության նախարարության և Մարդու իրավունքների պաշտպանի աշխատակազմի ներկայացուցիչներ, որոնք պատասխանեցին ներկաների հարցերին և ներկայացրին իրենց դիրքորոշումը։

Մանրամասները՝ տեսանյութում:

Մարդու իրավունքների պաշտպանության ազգային ռազմավարությունից բխող 2023-2025 թթ. գործողությունների իրականացման ծրագրի 2023-2024 թթ. իրականացման ենթակա գործողությունների հասարակական մշտադիտարկման արդյունքների զեկույցն ամբողջությամբ՝ այստեղ։