Iravaban.net-ի փոխանցմամբ ՀՀ հակակոռուպցիոն դատարանում սեպտեմբերի 25-ին դատավոր Ռոբերտ Ավագյանի նախագահությամբ շարունակվեց Դատական ակտերի հարկադիր կատարման ծառայության նախկին պետ, ԱԺ նախկին պատգամավոր Միհրան Պողոսյանի և նրան փոխկապակցված անձանց ենթադրյալ ապօրինի ծագում ունեցող գույքի բռնագանձման գործով դատական նիստը:
Դռնբաց նիստ, սակայն առանց տեսանկարահանման.
Նիստի սկզբում նախագահող դատավոր Ռոբերտ Ավագյանը սովորականի պես անդրադարձավ դատավարության լուսաբանման հարցին: Ինչպես նախորդ նիստերին, այս անգամ ևս պատասխանողների շահերը ներկայացնող փաստաբաններ Արթուր Հովհաննիսյանը և Արամ Օրբելյանն առարկեցին տեսանկարահանումներին:
Փաստաբանները պնդեցին, որ տեսանկարահանումը կարող է խանգարել գործի արդարացի քննությանը և ազդել դատավարության մասնակիցների վրա: Դատարանը հաշվի առավ այս առարկությունը՝ նիստը շարունակվեց առանց տեսանկարահանման:
Դատական նիստի ընթացքը.
Նիստին ներկա էին Միհրան և Լիա Պողոսյանների, Գագիկ Բադալյանի և Կարինե Մխիթարյանի ներկայացուցիչները:
Դատական նիստի ընթացքում հայցվորի ներկայացուցիչ Արևիկ Ավոյանը հանդես եկավ հայցի առարկայի փոփոխություն կատարելու միջնորդությամբ: Ըստ հայցվորի ներկայացուցչի՝ կատարվել է պահանջի վերահաշվարկ, որի արդյունքում դրամային պահանջն էականորեն նվազել է:
«Իրականացվել է լրացուցիչ վերլուծություն և ճշգրտվել են գույքի արժեքի որոշ տարրեր, ինչի արդյունքում ընդհանուր պահանջի գումարը նվազել է», – նշեց հայցվորի ներկայացուցիչը:
Պատասխանողների ներկայացուցիչները հայտնեցին, որ դեմ չեն հայցի առարկայի փոփոխությանը, քանի որ պահանջվող գումարը նվազում է: Սակայն նրանք պնդեցին, որ փոփոխությունը պետք է վերաբերի միայն հայցի առարկային, ոչ թե հիմքին:
«Խնդրում ենք բավարարել միջնորդությունը, սակայն միայն հայցի առարկայի փոփոխության մասով: Հայցի հիմքի փոփոխություն անհրաժեշտ չէ, քանի որ դա կհանգեցնի նոր ապացույցների ներկայացման և դատավարության ձգձգման», – նշեց Արթուր Հովհաննիսյանը:
Նիստի հետաձգման պատճառները.
Դատարանը որոշեց առանձին դատական ակտի ձևով քննարկել միջնորդությունը՝ հաշվի առնելով, որ գործին մասնակցող որոշ անձինք դատական նիստին չէին ներկայացել:
«Հաշվի առնելով, որ գործին մասնակցող որոշ անձինք դատական նիստին չեն ներկայացել՝ Դատարանը պետք է առանձին դատական ակտի ձևով որոշում կայացնի միջնորդության հարցը ընդունելու կամ մերժելու վերաբերյալ: Այս հանգամանքով պայմանավորված գործի քննությունը անհրաժեշտ է հետաձգել», – նշեց դատավոր Ռոբերտ Ավագյանը:
Հաջորդ դատական նիստը նշանակվեց հոկտեմբերի 29-ին, ժամը 14:00-ին:
Գործի պատմությունը.
Ըստ դատարանի նյութերի՝ ՀՀ գլխավոր դատախազությունը 2020թ. հոկտեմբերի 7-ին որոշում է կայացրել Միհրան Պողոսյանին պատկանող գույքի առնչությամբ թիվ 22-41-20 ուսումնասիրությունը սկսելու մասին: Հայցադիմումը ներկայացվել է Հակակոռուպցիոն դատարան 2022թ. սեպտեմբերի 30-ին և ընդունվել վարույթ հոկտեմբերի 5-ին:
Հայցի առարկա է հանդիսանում Միհրան Պողոսյանին և նրա հետ փոխկապակցված անձանց պատկանող ենթադրաբար ապօրինի ծագում ունեցող գույքը: Ըստ հայցի՝ Պողոսյանը, հանդիսանալով պաշտոնատար անձ, օրենքով սահմանված արգելքին հակառակ, հիմնադրել է ձեռնարկատիրական գործունեություն իրականացնող կազմակերպություններ և վստահված անձանց միջոցով մասնակցել է դրանց կառավարմանը:
Գործով բռնագանձման ենթակա գույքը.
Հայցի առարկա է հանդիսանում հետևյալ գույքը.
- Բազմաթիվ անշարժ գույք (առևտրային տարածքներ, խանութներ, բնակելի տներ) Երևանում և Ծաղկաձորում
- Տրանսպորտային միջոցներ (այդ թվում՝ Range Rover և Porsche մակնիշի)
- Ընկերությունների բաժնեմասեր, այդ թվում՝
- «ՉԱՅԽՈՆԱ 1» ՍՊԸ (50%)
- «ԱԿՈՒԱ» ՍՊԸ (100%)
- «ԿԵՉԱՌԻՍ ՀՈԹԵԼ» ՍՊԸ (100%)
- «ՖՐՈՒՏԻՄԷՔՍ» ՍՊԸ (100%)
- «ՔԵԹՐԻՆ ԳՐՈՒՊ» ՍՊԸ (100%)
- «ԲԱՆԱՆԵԿ» ՍՊԸ (100%)
- «ՄՐԳԵՆԻ» ՍՊԸ (100%)
- Փոխառությունների գծով պահանջի իրավունքներ (այդ թվում՝ Գևորգ Աֆանդյանին տրամադրված՝ 505.839.400 ՀՀ դրամ և «ՔԵԹՐԻՆ ԳՐՈՒՊ» ՍՊԸ-ին տրամադրված՝ 500.000 ԱՄՆ դոլարին համարժեք ՀՀ դրամ)
- Այլ դրամական միջոցներ
Հայցվող գույքի ընդհանուր արժեքը գերազանցում է «Ապօրինի ծագում ունեցող գույքի բռնագանձման մասին» ՀՀ օրենքի 24-րդ հոդվածով նախատեսված 50 միլիոն ՀՀ դրամի շեմը:
Գործի կողմերը.
Բացի հիմնական պատասխանող Միհրան Պողոսյանից, գործով պատասխանողներ են ևս 12 անձ, այդ թվում՝ Կարինե Հենրիկի Մխիթարյանը, Լիա Միհրանի Պողոսյանը, Գագիկ Սամվելի Բադալյանը, Արթուր Ռուբենի Թադևոսյանը և այլոք:
Դատարանի 2023թ. նոյեմբերի 2-ի որոշմամբ գործին ներգրավվել են 19 ինքնուրույն պահանջ չներկայացնող երրորդ անձինք, այդ թվում՝ «Կոնվերս բանկ» ՓԲԸ, «ԱՄԵՐԻԱԲԱՆԿ» ՓԲԸ, «Էվոկաբանկ» ՓԲԸ, ինչպես նաև բռնագանձման ենթակա գույքի նկատմամբ վարձակալության իրավունք ունեցող ընկերություններ:
Գործի դատավարական զարգացումները.
Գործի քննության ընթացքում արդեն իսկ քննարկվել են մի շարք էական դատավարական հարցեր:
2024թ. հունվարին պատասխանողի ներկայացուցիչները միջնորդություն են ներկայացրել հայցային վաղեմություն կիրառելու մասին, պնդելով, որ 2023թ. հուլիսի 17-ին ներկայացված հայցի փոփոխությունը կատարվել է ուսումնասիրության ժամկետի խախտմամբ։ Դատարանը 2024թ. փետրվարի 29-ի որոշմամբ մերժել է այս միջնորդությունը:
Պատասխանողների միջնորդությամբ դատարանը մի շարք որոշումներ է կայացրել հայցի ապահովման միջոցների ձևափոխման վերաբերյալ, մասնավորապես թույլատրելով «ԿԵՉԱՌԻՍ ՀՈԹԵԼ» ՍՊԸ-ին կնքել վարձակալության պայմանագրեր:
Գործի հասարակական նշանակությունը.
Սույն գործը Հայաստանում «Ապօրինի ծագում ունեցող գույքի բռնագանձման մասին» օրենքի հիման վրա հարուցված խոշորագույն գործերից է և կարևոր նախադեպ կստեղծի այս օրենքի կիրառման պրակտիկայում: Գործը հատկապես նշանակալի է պետական պաշտոնատար անձանց գույքային հարցերի թափանցիկության տեսանկյունից:
Ցանկալի կլիներ, որ պատասխանողները և նրանց ներկայացուցիչները գիտակցեին այս հանգամանքը և ողջունեին դատական նիստերի տեսաձայնագրությունը՝ հիմք ընդունելով հաշվետվողականության և թափանցիկության սկզբունքները: Հաշվի առնելով, որ խոսքը նախկին պաշտոնատար անձանց գույքին առնչվող գործի մասին է, առկա է հանրային մեծ հետաքրքրություն դատավարության ընթացքի նկատմամբ: Դատական նիստերի տեսալուսաբանումը կարող է էապես նպաստել հանրության իրազեկվածության բարձրացմանը և արդարադատության համակարգի նկատմամբ վստահության ամրապնդմանը:
Մանրամասները՝ դատական նիստի ձայնագրությունում։
