Հայաստանի 3-րդ նախագահ Սերժ Սարգսյանի եղբորորդու՝ Հայկ Սարգսյանի գործով տուժող Դավիթ Սիմոնյանն այսօրվա դատական նիստին դատարան էր եկել իր անվտանգությունը ապահովող երկու անձանց հետ:
Դատարանի որոշմամբ՝ նրանք տեղափոխվեցին դահլիճի մյուս հատված, ապակեպատ դահլիճի հակառակ կողմ, ուր լրագրողներն են ու մեղադրյալի հարազատները: Դատավորի խոսքով, դատական կարգադրիչների ներկայությունն արդեն իսկ ապահովում է նրա անվտանգությունը։
Հայկ Սարգսյանի պաշտպանը՝ Երեմ Սարգսյանը, հարց ուղղեց դատարանին, թե այդ ինչից կամ ումից պետք է պաշտպանեն տուժողին։ Նա միջնորդեց դատարանին՝ ոստիկանապետին հարցում ուղարկել՝ վերոնշվածը պարզաբանելու համար։
Նա նշեց նաև, որ որևէ փաստաթուղթ կամ որոշում որևէ մեկին չի ներկայացվել, ինչը մի շարք հարցեր է առաջացնում։
Նախագահող դատավոր Աննա Դանիբեկյանը ևս նշեց, որ դատական գործում նման որոշում առկա չէ։
Դատարանը միջնորդությունը մերժեց։
Հիշեցնենք, որ Հայկ Ալեքսանդրի Սարգսյանին մեղադրանք է առաջադրվել այն բանի համար, որ նա 2007 թվականի ապրիլի 1-ին` ժամը 16:00-ի սահմաններում, իր բնակության վայրի` Երևան քաղաքի Թումանյան փողոցի 11շենքի 14 բնակարանի նկուղային հարկում գտնվող սենյակում, քննությամբ չպարզված հանգամանքներում ապօրինի ձեռք բերած և պահվող, հրազեն հանդիսացող տեսակի մոդելի ատրճանակով Դավիթ Աշոտի Սիմոնյանին ապօրինաբար կյանքից զրկելու դիտավորությամբ կրակել է վերջինիս որովայնին, սակայն հանցագործությունն ավարտին չի հասցրել իր կամքից անկախ հանգամանքներում: Գործի հետ կաված որպես իրեղեն ապացույցներ են ճանաչվել 9մմ տրամաչափի, 7421361 ինքնաշեն դրոշմված համարի «SIG SAUER» տեսակի «P266» մոդելի ատրճանակը։
