Երևանի ընդհանուր իրավասության դատարանում այսօր՝ հուլիսի 2-ին, շարունակվում է ՀՀ 3-րդ նախագահ Սերժ Սարգսյանի եղբորորդու` Հայկ Ալեքսանդրի Սարգսյանի գործով դատական նիստը:

Հայկ Սարգսյանի ընտանիքի անդամների նկատմամբ դատարանը սանկցիա կիրառեց, քանի որ դատավորի դահլիճ մտնելու պահին վերջիններս ոտքի չկանգնեցին:

«Հաջորդ անգամ կհեռացվեք նիստերի դահլիճից»,-նշեց նախագահող դատավոր Աննա Դանիբեկյանը:

Նիստին ներկա է նաև գործով վկա Սամվել Ասլանյանը, ով այժմ ցուցմունք է տալիս:

Մանրամասները՝ տեսանյութում

Հիշեցնենք, որ մեղադրական եզրակացության համաձայն, Հայկ Սարգսյանը 2007թ. ապրիլի 1-ին ժամը 16:00-ի սահմաններում իր բնակության վայրի` Երեւան քաղաքի Թումանյան փողոցի 11 շենքի 14 բնակարանի նկուղային հարկում գտնվող սենյակում քննությամբ չպարզված հանգամանքներում ապօրինի ձեռք բերած եւ պահվող, հրազեն հանդիսացող «SIGSAUER» տեսակի ատրճանակով Դավիթ Սիմոնյանին ապօրինաբար կյանքից զրկելու դիտավորությամբ կրակել է վերջինիս որովայնին, սակայն հանցագործությունն ավարտին չի հասցրել իր կամքից անկախ հանգամանքներում:

Նշենք նաև, որ Հայկ Սարգսյանը 2018 թվականի հուլիսի 11-ին կալանավորվել էր, իսկ սեպտեմբերի 10-ին, 50 միլիոն դրամ գրավի դիմաց ազատ արձակվել: