Մարտի 19-ին «Խոտի դեզի» գործով ամբաստանյալ Ա-ի պաշտպան Վահե Գաբրիելյանը դատարանին ինքնաբացարկի միջնորդություն է ներկայացնելու, այսինքն` պահանջելու է փոխել գործը քննող երեք դատավորներին` նախագահող դատավոր Արարատ Պետրոսյանին, Սևակ Համբարձումյանին և Լիլիթ Թադևոսյանին: Այս մասին Իրավաբան.net-ը տեղեկացավ Ա-ի պաշտպան Վահե Գաբրիելյանից:
Բանն այն է, որ Վերաքննիչ քրեական դատարանը Քեմբրիջի շրջանավարտ Ա-ի և մյուսների գործով վերջին դատական նիստին որոշել է Ա-ի` քննիչին տված բացատրությունը ապացույց ճանաչել և հրապարակել:
Ըստ նրա` դատախազ Արսեն Աղաբեկյանի միջնորդել է այդ բացատրությունն այլ փաստաթուղթ ճանաչել, սակայն դատարանը, խորհրդակցելով, որոշել է ապացույց ճանաչել:
«Մի քիչ ծիծաղելի էր դատախազի միջնորդությունը, քանի որ այդպիսի կատեգորիա չկա քրեական դատավարությունում, որ այլ փաստաթուղթ ճանաչի դատարանը. կարող ես խնդրել, որ այլ փաստաթուղթը դատարանը ապացույց ճանաչի»,- ասաց Վահե Գաբրիելյանը:
Պաշտպանի պնդմամբ` դատարանը նման որոշում կայացնելու համար պատճառաբանություն չի ներկայացրել, ապա տեսնելով, որ պաշտպանական կողմը դեմ է, սկսել է պատճառաբանել որոշումը:
Ի դեպ, Արմավիրի մարզի ընդհանուր իրավասության դատարանը գործի քննության ժամանակ մերժել էր դատախազի նույն միջնորդությունը:
Անձի մոռացվելու իրավունքի իրացման նպատակով հրապարակման մեջ անուն-ազգանուն/ները, լուսանկար/ները, տեսանյութ/երը խմբագրվել են և չեն արտացոլում իրական անձանց տվյալները: 7.06.2018
