Քիչ առաջ Հանրային հեռուստաընկերության եթերում Հատուկ քննչական ծառայության պետ Սասուն Խաչատրյանը հայտարարություն արեց այն մասին, որ մեղադրանք է առաջադրվել մեկ այլ հայտնի քաղաքական գործչի՝ Ռոբերտ Քոչարյանի նախագահության ժամանակ նախագահի աշխատակազմի ղեկավար Արմեն Գևորգյանին:
Ս. Խաչատրյանը պատմեց, որ Արմեն Գևորգյանը և մեկ այլ անձ, ովքեր աշխատել են նախագահի աշխատակազմում, 2008 թվականին ճնշում են գործադրել սահմանադրական դատարանի անդամ Վալերի Պողոսյանի վրա՝ վերջինիս եղբոր միջոցով: Սահմանադրական դատարանում վիճարկվում էին 2008-ի նախագահական ընտրությունների արդյունքները:
ՍԴ անդամի վրա ճնշումների մասին տեղեկությունները հայտնի են դարձել wikiLeaks-ի կողմից:
Սասուն Խաչատրյանը հայտնեց, որ Արմեն Գևորգյանին մեղադրանք է առաջադրվել քրեական օրենսգրքի 332 հոդվածի 3-րդ մասով սահմանված արարք կատարելու՝ արդարադատության իրականացմանը խոչընդոտելու համար:
Մեղադրանքն ապացուցված համարվելու դեպքում նրան կարող է սպառնալ մինչև 6 տարվա ազատազրկում:
Սասուն Խաչատրյանը նշեց նաև, որ Արմեն Գևորգյանի հանդեպ միջնորդել են խափանման միջոց ընտրել ստորագրությունը՝ չհեռանալու մասին:
