Վաշինգտոնում, հունվարի 10-ին, ձերբակալվել է դերասան Հոակին Ֆենիքսը, ինչպես նաև մոտ 147 այլ ցուցարարներ՝ ընդդեմ կլիմայի փոփոխության հանրահավաքի ժամանակ: Այդ մասին հայտնում է Variety– ը:
Ֆենիքսը հավաքի ժամանակ ելույթ է ունեցել և հայտարարել, որ մսի և կաթնամթերքի արդյունաբերությունը կլիմայի փոփոխության երրորդ պատճառն է: Վերջին երեք ամիսների ընթացքում Վաշինգտոնում ամեն շաբաթ բողոքի ցույցեր են անցկացնում ընդդեմ խոշոր բանկերի և ընկերությունների, որոնք հովանավորում են արդյունաբերական ձեռնարկությունների զարգացումը: Ակցիայի կազմակերպիչը դերասանուհի Ջեյն Ֆոնդան է:
Variety- ի փոխանցմամբ՝ հունվարի 10-ին հանրահավաքին մասնակցել են դերասաններ Մարտին Շինը, Մեգի Գիլենհաալը և Սյուզան Սարանդոնը: CNN- ի փոխանցմամբ՝ Շինին նույնպես ձերբակալել են:
Հիշեցնենք, որ հունվարի 5-ին Հոակին Ֆենիքսը «Ոսկե գլոբուս»-ի մրցանակաբաշխության ժամանակ լավագույն դերասանի կոչումն է ստացել The Joker ֆիլմում իր դերի համար։
