ՀՀ կառավարությունն այսօր կայացած նիստի ընթացքում հավանություն է տվել «Մաքսային կարգավորման մասին» օրենքում փոփոխություն եւ լրացումներ կատարելու մասին» օրենքի նախագծին:
Նախագծի մշակումը պայմանավորված է փոքր եւ միջին ձեռնարկատիրական գործունեության իրականացման ընթացքում ապրանքների ներմուծման եւ արտահանման գործընթացները պարզեցնելու անհրաժեշտությամբ:
ՀՀ էկոնմիկայի նախարար Արծվիկ Մինասյանը նշել է, որ խնդիրը ներկայացվել է մարտին կայացած ՓՄՁ զարգացման խորհրդի նիստին եւ, ՀՀ վարչապետի հանձնարարությանը համապատասխան, իրականացվել են աշխատանքներ, որոնց մասնակցել են բոլոր շահագրգիռ գերատեսչությունները:
Արդյունքում ակնկալվում է պարզեցնել ցածր արժողություն ունեցող ապրանքների մաքսային սահմանով տեղափոխման գործընթացը, նշված դեպքում ազատել տնտեսվարողներին մաքսավճարների վճարման պարտականությունից:
Մասնավորապես, փոփոխությամբ առաջարկվում է մեկ փոխադրողից մեկ ստացողին մեկ տրանսպորտային փաստաթղթով արտահանվող եւ/կամ ներմուծվող ընդհանուր մաքսային արժեքը 200 եվրոյին համարժեք գումարը չգերազանցող գումարի չափով ապրանքները ազատել մաքսատուրքերի եւ մաքսավճարների վճարումից:
Նախագծով առաջարկվող փոփոխությունը հնարավորություն է տալիս նաեւ տնտեսվարող սուբյեկտներին, անկախ ներմուծվող եւ արտահանվող ապրանքների արժեքից, իրականացնել ինքնահայտարարագրում:
Միաժամանակ առաջարկվում է կառավարության որոշմամբ հաստատել էլեկտրոնային տնտեսվարող սուբյեկտների կողմից հայտարարագրման համակարգ մուտք գործելու կարգը:
Նախարարի դիտարկմամբ, օրինագծով առաջարկվող փոփոխությունն էապես բարելավելու է բիզնես միջավայրը, բիզնես ակտիվությունը, նպաստելու է ՓՄՁ գործունեությունը:
Հովիկ Աբրահամյանը կարեւորել է օրենքի նախագիծը եւ հանձնարարել աշխատանքներ տանել ԱԺ-ում այն արագ ընդունելու համար:
