11 օր շուրջ 20 ընտանիք առանց ջրի է մնացել։ Iravaban.net-ի խմբագրություն է ահազանգել Նոր Խարբերդ համայնքի բնակիչ Սուսաննա Շահինյանը։ Նա ասաց, որ 19-րդ փողոցի բազմաթիվ տներում ջուր չկա, բնակիչները զրկված են կենսական կարիքները հոգալու տարրական պայմաններից։
Նրա խոսքով՝ խնդիրն առկա է արդեն շուրջ 8 տարի՝ հատկապես ամռան շրջանում։ Բնակչի խոսքով՝ խնդիրն այն է, որ վերը նշված փողոցում ավելացել են նոր տներ, «Վեոլիա ջուր» ընկերությունը բավարար քանակով ջուր բաց չի թողնում ինչի արդյունքում բազմաթիվ ընտանիքներ զրկված են ջրից։ Բացի այդ՝ տարածքում չկա նաև ոռոգման ջուր, բնակիչները իրենց հողամասը, ծառերը ջրում են տան ծորակից հոսող ջրով, ինչի հետևանքով որոշ տներ ջուր չի հասնում։
«Եթե «Վեոլիա ջուր» ընկերությունը իրեն նեղություն տա և օրը վեց ժամ բարձր ճնշումով ջուր տա, այս իրավիճակը չի լինի։ Անցած ամիս էլ էր այս իրավիճակը, օրեր շարունակ ջուր չենք ունեցել։ Գնացել ենք Մասիսի քաղաքապետարան։ Այնտեղ դիմում գրեցինք, ստորագրեցինք, թողեցինք եկանք։ Գյուղապետին ամեն օր տեղյակ ենք պահում այս խնդրի մասին, ամեն օր զանգում ենք իրեն, բայց այս հարցը չի լուծվում։ Ամեն օր զանգում ենք «Վեոլիա ջուր» ընկերություն։ Ասում են՝ մեր մեղքը չի, խնդիրն ուղարկել ենք համապատասխան բաժիններ։ Բնակիչներից մեկին էլ ասել են՝ գտեք ինժեներին, թող պատասխան տա։ Ես պիտի՞ ընկնեմ ինժեներ ման գամ։ «Վեոլիա ջուրը» պետք է իր ինժեներին կանչի պատասխանատվության, ոչ թե ես»,-ասաց նա։
Քաղաքացին նշեց, որ իրենք ընկերության բաժանորդ չեն, բազմաթիվ դիմումներ են ներկայացրել, որ ընկերությունը իրենց դարձնի բաժանորդ, սակայն որևէ արձագանք չկա, փոխարենը՝ պարբերաբար տուգանում են։
«Այսօր կգանք, վաղը կգանք և չեն գալիս։ Ջրաչափի գումարը տեսուչը տարել, «կերել» է, հիմա մենք այս խնդրի առաջ ենք։ Հիմա էլ ասում են, որ 150 հազար դրամ պետք է վճարենք՝ բաժանորդ դառնալու համար։ Ես այդքան գումար չունեմ, ասում եմ՝ դարձրեք մաս-մաս վճարելու հնարավորությամբ, որ կարողանանք վճարել։ Մեզ չեն դարձնում բաժանորդ, բայց ասում են, թե ապօրինի ջրամիացում ենք արել և տուգանում են»,-ասաց Սուսաննա Շահինյանը։
Iravaban.net-ը կապ հաստատեց նաև Նոր Խարբերդի համայնքապետ Կամո Կակոյանի հետ։ Կակոյանը իրավիճակը նկարագրեց այսպես՝ խայտառակ վիճակ է։ Նա նշեց, որ խնդրից տեղյակ է, ամեն օր կապ է հաստատում «Վեոլիա ջուր» ընկերություն հետ։
«Զանգահարել եմ, ինձ ասում են՝ զանգեք գյուղապետին, չգիտեն, որ ես եմ գյուղապետը։ Զանգում եմ 1-85, չեմ ներկայանում որպես գյուղապետ և ասում եմ, որ 19 փողոցում ջուր չկա, նորից ասում են՝ զանգեք գյուղապետին։ Մեր մեջ տհաճ խոսակցություն գնաց։ Ասում եմ գյուղապետարանում «վինտիլ» չկա, որ մենք բացենք, փակենք։ Մարդիկ պահանջում են, ջուր չկա, իսկ դուք ասում եք՝ գյուղապետին զանգեք։ Ես անձամբ, որտեղ որ ապրում եմ, տարաներով ջուր եմ կրում։ Ես գյուղապետն եմ, բայց որ զանգեն ինձ ի՞նչ պետք է փոխվի։ Գյուղապետը ջրի հետ ինչ կապ ունի՞»,-ասաց նա։
Համայնքապետի խոսքով՝ խնդիրը այն է, որ ջուրը քիչ քանակով է բաց թողնվում ու չի բավարարում։
«Բայց դե թող մի բան մտածեն, որ գոնե 2 ժամ ջուր ունենան մարդիկ, դրան էլ ենք համաձայն։ Ամեն կես ժամը մեկ, 40 րոպեն մեկ, մեկ ժամը մեկ ես խոսում եմ իրենց հետ»,-ասաց Կամո Կակոյանը։
Խնդրի վերաբերյալ պարզաբանում ստանալու նպատակով Iravaban.net-ը կապ հաստատեց նաև «Վեոլիա ջուր» ընկերության հետ։ Մի քանի փորձից հետո վերջապես ստացանք պատասխան։
Ընկերության լրատվության բաժնի պատասխանատուն, երբ փոխանցեցինք քաղաքացու հայտնած տեղեկությունը, նախ ապշեց, թե ինչպես է հնարավոր 8 օր ջուր չունենալ, ապա ասաց, որ ինքը կփորձի ճշտումներ կատարել։ Մեկ օր անց պատասխան ստացանք։
«Խնդիրը 1-85-ը գրանցել է, հիմա մեր տեղամասի հետ են աշխատում, որպեսզի տեղում կարողանան աշխատել, բացատրել, թե ինչ է կատարվում, քանի որ դա Երևանը չէ, տեղամասն է հիմա իրենց հետ կապի մեջ։ Գրանցվել է խնդիրը, նաև ներքին գրություն է ուղարկվել, որպես շտապ լուծում պահանջող խնդիր»,-ասացին ընկերությունից։
Մեր հարցին, թե արդյո՞ք որևէ պարզաբանում կա, թե ինչու մարդիկ 8 օր ջուր չունեն, պատասխանեցին, որ արդեն կապվել են տեղամասի հետ, որպեսզի պատասխան և պատասխանատվություն պահանջեն։
«Իրոք, լուրջ զբաղվում են հիմա, որովհետև պարզապես անտանելի է վիճակը և բոլոր ատյանները մեզ մոտ ահազանգը ստացել են»,-ասաց ընկերության մամուլի բաժնի ներկայացուցիչը։
Հարկ է նշել, որ արդեն 11-րդ օրն է, ինչ ընկերության «լուրջ զբաղվելուց» հետո էլ բնակիչները դեռ ջուր չունեն, իսկ առաջացած խնդիրներն ու անհարմարություններն ավելանում են, այսինքն՝ պարզապես անտանելի է, վիճակը մնում է նույնը։
Թերևս, մեզ ահազանգած քաղաքացին նշեց, որ դիմում են գրել նաև Մարդու իրավունքների պաշտպանին, սակայն խնդրին լուծում տվող որևէ արձագանք չեն ստացել։
Ջրից զրկված քաղաքացիները ստիպված են եղել դիմել նաև Կառավարություն։ Սուսաննա Շահինյանը նշեց՝ այնտեղից, առհասարակ որևէ արձագանք չեն ստացել։
Սուսաննան մեզ տրամադրեց նաև «Վեոլիա ջուր» ընկերության հետ նամակագրություններից մեկը։ Ինչից պարզ է դառնում, որ ընկերությունում վաղուց տեղյակ են խնդրի մասին։
