Սեպտեմբերի 5-ին Իրավաբանների հայկական ասոցիացիայի կենտրոնական գրասենյակում տեղի ունեցավ «Հանրության գերակա շահերի ապահովման նպատակով սեփականության օտարման մասին» ՀՀ օրենքի փոփոխության նախագծի քննարկում։ Միջոցառումը նպատակ ուներ համախմբել շահագրգիռ կողմերին՝ այս կարևոր իրավական փաստաթղթի վերաբերյալ արդյունավետ երկխոսություն ծավալելու համար։
Քննարկման արդյունավետությունն ապահովելու նպատակով միջոցառմանը հրավիրվել էին Երևան քաղաքի Տերյան փողոցի 23 և 25 շենքերի մի խումբ բնակիչներ, որոնց սեփականությունը նախկինում ճանաչվել էր հանրային գերակա շահ։ Այս մոտեցումը հնարավորություն տվեց բանավեճը հարստացնել իրական փորձառությամբ և գործնական օրինակներով՝ հաղորդելով քննարկմանը պրակտիկ բնույթ։
Միջոցառումը բացելով՝ Իրավաբանների հայկական ասոցիացիայի նախագահ Կարեն Զադոյանն ընդգծեց նման հանդիպումների կարևորությունը օրենսդրական փոփոխությունների արդյունավետ քննարկման գործում։ Նա հատուկ ուշադրություն հրավիրեց նախագծի հետ կապված հնարավոր իրավական ռիսկերին և դրանց ազդեցությանը հանրության ու սեփականատերերի իրավունքների պաշտպանության համակարգի վրա։
Քննարկման առանցքային մասում Իրավաբանների հայկական ասոցիացիայի իրավաբան Մարիաննա Ավագյանը մանրամասն վերլուծություն ներկայացրեց նախագծի նոր դրույթների վերաբերյալ։ Նա համեմատական վերլուծություն իրականացրեց գործող օրենսդրության և առաջարկվող փոփոխությունների միջև՝ առանձնացնելով հնարավոր իրավական հետևանքները։ Իրավաբանը հատկապես կարևորեց այդ փոփոխությունների ազդեցությունը սեփականատերերի իրավունքների պաշտպանության և հանրային շահերի արդյունավետ հավասարակշռման վրա։
Ներկայացումներին հաջորդեց բովանդակալից և կառուցողական քննարկում, որի ընթացքում մասնակիցները հնարավորություն ունեցան արտահայտելու իրենց դիտարկումները, մտահոգություններն ու առաջարկությունները։ Միջոցառման մասնակիցները կիսվեցին նաև գործնական փորձով, ինչը թույլ տվեց ստանալ ամբողջական պատկեր օրենսդրական փոփոխությունների հնարավոր հետևանքների վերաբերյալ։
Ամփոփելով հանդիպումը՝ Կարեն Զադոյանը շնորհակալություն հայտնեց բոլոր մասնակիցներին՝ նշելով, որ նման հանդիպումները կարևոր նշանակություն ունեն օրենսդրական փոփոխությունների որակն ապահովելու և հանրության իրավունքները պաշտպանելու համար։ Նա հավաստիացրեց, որ քննարկման արդյունքերի համակողմանի ամփոփման հիման վրա կպատրաստվեն օրենքի փոփոխությունների վերաբերյալ հիմնավորված առաջարկներ, որոնք կներկայացվեն ՀՀ արդարադատության նախարարություն՝ օրենսդրական գործընթացին օժանդակելու նպատակով։
