2020-ի սեպտեմբերի 27-ի պատերազմի սկսվելու մասին Արցախի Հին Թաղեր համայնքի ղեկավար Էդիկ Այվազյանը համագյուղացիներից է իմացել ու վերադարձել գյուղ։ Իրավաբան․net-ի հետ զրույցում Այվազյանը պատմեց, որ սեպտեմբերի 28-ին արդեն Հին Թաղերում էր, բոլորը իրենց տեղում էին։

Երբ պատերազմը տեղափոխվեց Ջրական (Ջաբրայիլ), հրահանգ ստացան, որ կանանց ու երեխաներին պետք է անվտանգ վայր տեղափոխեն։

«Կանանց ու երեխաներին անցկացրինք Հայաստանի սահմանը, տղամարդկանցով մնացինք գյուղում։ Հին Թաղերը հեռու էր առաջնագծից։ Երբ Հանդրութը սկսեցին ռմբակոծել, հրահանգ ստացվեց, որ գյուղի դիրքերում խրամատներ պետք է փորվեն։ Թուրքերն ու ազերիները արդեն հասել էին Արա լեռ։ 90-ականներից գյուղում խրամատներ կային փորված, թարմացրիք, 19 հոգով մնացինք դիրքավորված»,-նշում է Էդիկ Այվազյանը։

44-օրյա պատերազմի ընթացքում գյուղը չի ռմբակոծվել։ Նոյեմբերի 9-ի հայտարարության ստորագրումից հետո են հարձակվել գյուղի վրա։

Մանրամասները՝ տեսանյութում։

Հիշեցնենք, որ 2020 թվականի սեպտեմբերի 27-ին ադրբեջանական կողմը մարտական գործողություններ է սանձազերծել Լեռնային Ղարաբաղում և օկուպացրել է դրա մեծ մասը, այդ թվում՝ Շուշի քաղաքը։

Նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին սեպտեմբերի 27-ից սկսած ռազմական գործողությունների դադարեցման վերաբերյալ։

Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։

Բացի այդ, շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր 1960 զինվորականի չափով, հրազենային զենքով, 90 զրահատրանսպորտային և 380 ավտոմեքենաներով և հատուկ տեխնիկայով։ Խաղաղապահները մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։

Նշվում է նաև, որ ներքին տեղահանվածները և փախստականները վերադառնում են ԼՂ և հարակից շրջաններ, իրականացվում է ռազմագերիների փոխանակություն և մյուս պահվող անձանց փոխանակություն, ապաարգելափակվում են բոլոր տնտեսական և տրանսպորտային կապերը տարածաշրջանում։