Այսօր Ազգային ժողովը քննարկում էր քրեական օրենսգրքում փոփոխություններ և լրացումներ կատարելու մասին նախագիծը և կից փաստաթղթերի փաթեթը, որը ԱԺ էր ներկայացրել կառավարությունը:
Քվեարկության արդյունքի գաղտնիքի բացահայտումը, նախապես տրված խոստումի հիման վրա, տարընթերցման տեղիք էր տալիս և դրույթի վերաբերյալ մտահոգությունները բարձրաձայնվել էին նաև ԱԺ պետաիրավական հանձնաժողովում:
«Մենք ընդունելով այս մտահոգությունները, փոփոխություններ կատարեցինք և հանեցինք «նախապես տրված խոստումի» բառերը և թողեցինք, որ օրենքի խախտում կդիտվի, եթե մարդը շահադիտական դրդումներով բացահայտի քվեարկության արդյունքը և այն էլ փաստաթղթի, լուսանկարահանման կամ տեսաձայնագրմամբ ստացված տեղեկությունը բացահատելու միջոցով: «Այլ առարկաների միջոցով» բառերը նույնպես դուրս հանվեցին նախագծից՝ ապահովելով իրավական որոշակիություն»,-նշեց արդարադատության փոխնախարար Արթուր Հովհաննիսյանը:
Հաջորդ կարևոր փոփոխությունը, որի մասին մտահոգություն էին հայտնել ԱԺ պետաիրավական հանձնաժողովի անդամները, վերաբերում էր «կաշառք տալու առաջարկը ընդունելուն» ձևակերպմանը:
«Մենք այս փուլում որոշեցինք «կաշառք տալու առաջարկը ընդունելու» ձևակերպումը դուրս հանել նախագծից և թողնել միայն այն, ինչ կար 2015 թվականից հետո, այսինքն, «կաշառք ստանալը» կամ «կաշառք պահանջելը»»,-նշեց փոխնախարարը:
Հաջորդ փոփոխությունը կատարվել է ընտրակաշառք տալուն վերաբերող հոդվածի սանկցիայում: Նախագիծը նախատեսում էր 3-4 միլիոն դրամ սանկցիան: Արթուր Հովհաննիսյանը նշեց, որ այստեղ վրիպակ կա, քանի որ քրեական օրենսգիրքը «տուգանք» պատժատեսակի առավելագույն շեմ է սահմանում 3 միլիոն դրամը. «Այստեղ մենք փոխեցին և դարձրեցին ք 2,5-3 միլիոն դրամ»:
Ընտրակաշառքի համար տուգանքից և ազատազրկումից բացի որպես պատժատեսակ սահմանվեց նաև «կալանք» սանկցիան՝ 2-3 ամիս ժամկետով:
Վարչական պատասխանատվություն էր նախատեսվում նաև քվեարկության վայրում, քվեախցիկում գտնվելու իրավունք ունեցող անձի կողմից իր վկայականը ոչ տեսանելի ձևով կրելու համար:
Արթուր Հովհաննիսյանը նշեց, որ հոդվածում չկար մեղքի ձևը և հաշվի առնելով ՎԻՎ օրենսգրքի առանձնահատկությունները՝ եթե չկա մեղքի ձևը, այդ արարքը կարող էր նաև անզգուշությամբ կատարվել:
«Դրա համար մենք այս հոդվածի դիսպոզիցիայում սահմանեցինք մեղքի հստակ ձև, այսինքն, արարքը պետք է կատարվի միայն դիտավորությամբ, որպեսզի անձը ենթարկվի վարչական պատասխանատվության»,-նշեց նախարարը:
Նախագիծը դրվեց քվերակության և ընդունվեց 82 կողմ, 0 դեմ, 0 ձեռնպահ ձայներով:
