Կարանտին հայտարարելու վերաբերյալ կառավարության 2020 թվականի սեպտեմբերի 11-ի որոշման մեջ այսօր լրացումներ և փոփոխություններ են կատարվել։

Կանխարգելման նոր միջոցների ներդրմամբ պայմանավորված՝ կառավարությունը վերանայել է կարանտինային սահմանափակումների շրջանակը։
✅ Այն քաղաքացիները, որոնք պատվաստման հավաստագիր կունենան, մեր երկիր գալու դեպքում ՊՇՌ թեսթ այլևս չեն հանձնի։
✅ ՀՀ մուտք գործելիս մինչև 1 տարեկան երեխաները ևս ՊՇՌ թեսթ հանձնելու կարիք չեն ունենա։

Ներկայացվող նախագծով տարանջատվում է կառավարության որոշման մեջ մեկուսացման և հոսպիտալացման պահանջը և հստակեցվում է առաջարկվող կարգավորումը։ Նախագծով նախատեսվում է նաև Հայաստան մուտք գործող անձի կողմից ներկայացնել կորոնավիրուսային հիվանդության (COVID-19) դեմ պատվաստված լինելու փաստը հավաստող փաստաթուղթ՝ պատվաստման սերտիֆիկատ:

«Այն քաղաքացիները, ովքեր կունենան պատշաճ պատվաստման հավաստագիր՝ կանաչ անձնագիր, այսուհետ Հայաստան գալու համար լրացուցիչ ՊՇՌ թեստի կարիք չեն ունենա», – ասաց Առողջապահության նախարարի պաշտոնակատար Անահիտ Ավանեսյանը։

Նրա խոսքով՝ Հայաստանը փորձում է ժամանակից հետ չմնալ ու քաղաքացիներին փորձում են զերծ պահել կատարվող ավելորդ հետազոտություններից ու ֆինանսական միջոցներ ծախսելուց:

Ավանեսյանն ասաց, որ մինչև մեկ տարեկան երեխաների համար երկիր մուտք գործելուց ՊՇՌ թեստավորման պահանջը հանել են:

Վարչապետի պաշտոնակատար Նիկոլ Փաշինյանն էլ իր հերթին ասաց, թե շատ լավ կլինի, որ ՀՀ քաղաքացիները մեկնելուց առաջ պատվաստվեն:

Փաշինյանի խոսքով՝ կարող են արձանագրել, որ Հայաստանում կորոնավիրուսի երրորդ ալիքը կայունացման որոշակի միտումներ է ցույց տալիս:

«Մենք բավականին լավ ենք կառավարել ու կառավարում կորոնավիրուսի համավարակը», – ասաց նա:

Վարչապետի պաշտոնակատարն ընդգծեց, որ, մեղմ ասած, փոթորիկներ էին ստեղծվում կորոնավիրուսի պայքարի դեմ իրենց քայլերի շուրջ:

«Բոլոր այդ մարդկանց՝ տեղեկատվությունը բաց է, խորհուրդ եմ տալիս տեսնել, թե ինչ է տեղի ունեցել մեզ ի ցույց տրվող երկրներում մինչև այսօր, նայել դինամիկան, բոլոր թվերը, առողջապահական համակարգի վիճակները: Մենք ամենաճգնաժամային շրջանում ունեցել ենք ընդհուպ օրը 2000 դեպք, բայց իրավիճակը երբեք դուրս չի եկել վերահսկողությունից», – ասաց Փաշինյանը:

Առողջապահության նախարարի պաշտոնակատարը տեղեկացրեց, որ երեկվա դրությամբ Հայաստանում պատվաստվել է յոթ հազար հարյուր քաղաքացի:

Նիկոլ Փաշինյանն էլ ասաց, թե ուրախ է, որ կառավարության անդամների մեծ մասը պատվաստվել է, պատվաստվել են ձեռքի տակ եղած բոլոր պատվաստանյութերով:

Որոշումը ընդունվեց։

Մանրամասները՝ տեսանյութում։