Իրավաբան.net կայքն իր ընթերցողներին պարբերաբար ներկայացնում է տարաբնույթ իրազեկումներ` նվիրված նրանց սոցիալական կարգավիճակի բարելավմանը։
Այժմ, ներկայացնում ենք ուսանողական նպաստների հատկացման կարգը, որը գործում է Երևանի պետական համալսարանում (Հաստատված ԵՊՀ գիտխորհրդի 2014 թվականի սեպտեմբերի 26–ի նիստում)։
Պետության կողմից ուսանողական նպաստի ձևով ուսման վարձավճարի լրիվ փոխհատուցում տրամադրվում է`
- մեկ ուսումնական տարվա ընթացքում սահմանված ժամկետներում հանձնած (առանց լուծարքային շրջանի) քննությունների և ստուգարքների արդյունքներով առավել բարձր գնահատականներ ունեցող ուսանողներին` մրցույթային կարգով,
- օրենքով նախատեսված հետևյալ սոցիալական խմբերում ընդգրկված անձանց`
ա) առանց ծնողական խնամքի մնացած ուսանողներին և նրանց թվին պարկանող անձանց` համաձայն «Առանց ծնողական խնամքի մնացած երեխաների սոցիալական պաշտպանության մասին» Հայաստանի Հանրապետության օրենքի,
բ) 1–ին և 2–րդ խմբերի հաշմանդամներին և հաշմանդամ երեխայի կարգավիճակ ունեցող անձանց` համաձայն «Հայաստանի Հանրապետության հաշմանդամների սոցիալական պաշտպանության մասին» Հայաստանի Հանրապետության օրենքի,
գ) զոհված զինծաօայողների երեխա–ուսանողներին` համաձայն «Զինծառայողների և նրանց ընտանիքների անդամների սոցիալական ապահովության մասին» Հայաստանի Հանրապետության օրենքի,
դ) պարտադիր ժամկետային զինվորական ծառայության ընթացքում հաշմանդամ դարձած ուսանողներին` համաձայն «Զինծառայողների և նրանց ընտանիքների սոցիալական ապահովության մասին» Հայաստանի հանրապետության օրենքի,
ե) պետության համար առաջնահերթություն և կարևորություն ներկայացնող մասնագիտություններով նպատակային ուսուցմամբ ընդունված ուսանողներին։
Ընդհանուր մրցույթից դուրս, պարտադիր ժամկետային զինվորական ծառայությունից զորացրված Հայաստանի Հանրապետության կառավարության կողմից հատկացված անվճար տեղերի հաշվին ընդունված ուսանողները` որպես նպատակային ուսուցմամբ ընդունվածներ, օգտվում են իրենց արտոնություններից` մինչև ուսումնառության ավարտը։
