Ռուսաստանն աջակցում է Հայաստանի և Ադրբեջանի համատեղ որոշմանը՝ լուծարելու Եվրոպայի անվտանգության և համագործակցության կազմակերպության (ԵԱՀԿ) Մինսկի խումբը, որը զբաղվում էր Լեռնային Ղարաբաղի հակամարտության կարգավորմամբ։
«Արմենպրես»-ի փոխանցմամբ՝ այս մասին РБК-ին հայտնել է ԵԱՀԿ-ում Ռուսաստանի մշտական ներկայացուցիչ Ալեքսանդր Լուկաշևիչը՝ հավելելով, որ խումբը նախատեսվում է ամբողջությամբ լուծարել մինչև 2025 թվականի դեկտեմբեր։
Նա նշել է, որ խոսքը վերաբերում է երեք ինստիտուտների՝ Մինսկի խմբի, ԵԱՀԿ գործող նախագահի անձնական ներկայացուցչի պաշտոնի և բարձր մակարդակի պլանավորման խմբի աշխատանքի դադարեցմանը։
«Հաշվի առնելով կողմերի դիրքորոշումը դրանք պահպանելու աննպատակահարմարության վերաբերյալ, մենք որևէ պատճառ չենք տեսնում կանխելու դրանց լուծարումը», – ասել է դիվանագետը։
Լուկաշևիչի խոսքով՝ Մինսկի խմբի լուծարման ընթացակարգը հետևյալն է. ԵԱՀԿ մշտական խորհուրդը (քաղաքական խորհրդակցությունների հիմնական որոշում կայացնող մարմինը) առաջարկել է կազմակերպության անդամներին հաստատել այս հարցի վերաբերյալ նախարարական որոշումը. եթե մինչև սեպտեմբերի 1-ը ոչ ոք չառարկի խմբի լուծարմանը, որոշումը կհամարվի ընդունված։
«Անհրաժեշտ է հաշվի առնել, որ այս որոշման իրականացման հետ կապված վարչական և ֆինանսական միջոցառումների իրականացումը կտևի մի քանի ամիս։ ԵԱՀԿ-ն նախատեսում է դրանք ավարտել մինչև այս տարվա դեկտեմբեր։ Որից հետո բոլոր երեք կառույցները, որոնք պատասխանատու էին Լեռնային Ղարաբաղի կարգավորմանը նպաստելու համար, պետք է դադարեն գոյություն ունենալ», – ասել է Ռուսաստանի մշտական ներկայացուցիչը։
Օգոստոսի 26-ին Ադրբեջանի արտգործնախարար Ջեյհուն Բայրամովը հայտարարել էր, որ ԵԱՀԿ Մինսկի խումբը լուծարելու որոշումը կկայացվի սեպտեմբերի 1-ին։
Հայաստանն ու Ադրբեջանն օգոստոսի 8-ին Վաշինգտոնում ստորագրել են Մինսկի խմբի լուծարման վերաբերյալ ԵԱՀԿ-ին ուղղված դիմումը, իսկ օգոստոսի 11-ին այն ուղարկել են կազմակերպությանը։
