ԱՄՆ-ը չի պատրաստվում հրաժարվել Ուկրաինային ռազմական օգնություն տրամադրելուց, CNN-ին տված հարցազրույցում ասել է Պետդեպարտամենտի ներկայացուցիչ Նեդ Փրայսը` մեկնաբանելով ամերիկյան լրատվամիջոցների հրապարակումները, թե Ռուսաստանը պահանջում է դադարեցնել նման աջակցությունը։
«Ռուսաստանը փակ ձևաչափով ինչ-որ բան ասաց, բացահայտ ասաց, բայց մեզ ոչինչ չի համոզի հրաժարվել մեր ընտրած ռազմավարությունից»,- ասաց նա։
Միաժամանակ նա չի հաստատել ԶԼՄ-ների տեղեկությունը, թե իբր Ռուսաստանը նոտա է հղել ԱՄՆ-ին՝ պահանջելով դադարեցնել Ուկրաինային աջակցելը։
«Բայց եթե Կրեմլը ենթադրում է, որ ԱՄՆ-ը և մեր գործընկերներն ամբողջ աշխարհում միլիարդավոր դոլարներ են տրամադրում ուկրաինացիներին անվտանգության աջակցության համար՝ ապահովելով հենց այն, ինչ պահանջում են ուկրաինացիները, և որ ուկրաինացիներն այդ ամենը շատ արդյունավետ օգտագործում են, ապա այդպես էլ կլինի։ Եվ կա»,- հավելեց նա:
Ռուսաստանը պաշտոնապես չի հայտարարել նոտա հղելու մասին, որի գրում են ամերիկյան լրատվամիջոցները։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
