Ինչպես տեղեկացնում է Iravaban.net-ը, Երևանի քաղաքացիական դատարանը վերադարձրել է Սամվել Սարգսյանի հայցադիմումն ընդդեմ ՀՀ կրթության, գիտության, մշակույթի և սպորտի նախարարության, ՀՀ ԿԳՄՍՆ բարձրագույն կրթության և գիտության կոմիտեի և «Երևանի թատրոնի և կինոյի պետական ինստիտուտ» ՊՈԱԿ-ի:
Ի՞նչ է պահանջում ուսանողը
Ըստ Դատալեքս համակարգի տեղեկությունների՝ Սարգսյանը 2025թ. հուլիսի 28-ին հայցադիմում է ներկայացրել Երևանի քաղաքացիական դատարան՝ պահանջելով անվավեր ճանաչել իրեն Երևանի թատրոնի և կինոյի պետական ինստիտուտի արվեստի պատմություն, տեսություն և կառավարում ֆակուլտետի հեռակա բաժնի 2-րդ կուրսից հեռացնելու մասին 2025թ. հունվարի 9-ի թիվ 03-Ա/ՈՒ հրամանը:
Բացի հրամանն անվավեր ճանաչելուց, հայցվորը պահանջել է իրեն վերականգնել որպես ուսանող և փոխադրել 3-րդ կուրս, ինչպես նաև ինստիտուտից բռնագանձել 1 միլիոն ՀՀ դրամ՝ որպես բարոյական փոխհատուցում, ինչպես նշված է հայցում, «ուսանողի կրած վիրավորանքների և նվաստացումների համար»:
Դատարանի որոշման հիմքերը
Դատավոր Սերինե Խաչատրյանի 2025թ. օգոստոսի 13-ի որոշմամբ հայցադիմումը վերադարձվել է մի շարք թերությունների հիմքով:
Դատարանը հայցադիմումը վերադարձնելիս նշել է հետևյալ հիմնավորումները.
- Հայցվորն ընդգրկել է երեք պատասխանողի, սակայն հստակ չի ձևակերպել, թե նրանցից յուրաքանչյուրին ուղղված կոնկրետ ինչ պահանջներ ունի
- Բարոյական փոխհատուցման պահանջի մասով չի հստակեցվել, թե իրավական որ հիմքով է այն ներկայացվում՝ վիրավորանքի, թե զրպարտության միջոցով է պատճառվել վնասը
- Հայցադիմումը չի համապատասխանում ՀՀ քաղաքացիական դատավարության օրենսգրքով սահմանված պահանջներին՝ ձևի, բովանդակության և կից փաստաթղթերի մասով
- Հայցադիմումին կից չի ներկայացվել հայցվորի կողմից նշված «ՀՊԳ ղեկավարի որոշման պատճենը», ինչի պատճառով դատարանը չի կարողացել գնահատել նաև պետական տուրքի վճարումը հետաձգելու միջնորդության հիմնավորվածությունը:
Դատարանի որոշման մեջ նաև ընդգծվել է, որ ոչ նյութական վնասի հատուցման պահանջը պետք է համապատասխանի ՀՀ քաղաքացիական օրենսգրքի 162.1-րդ հոդվածի պահանջներին:
Գործի հետագա ընթացքը
Համաձայն Դատալեքս համակարգի տվյալների՝ 2025թ. օգոստոսի 13-ից հետո թիվ ԵԴ2/7926/02/25 քաղաքացիական գործի վերաբերյալ այլ տեղեկություններ չկան: Հայտնի չէ, թե արդյոք հայցվորը որոշումը բողոքարկել է ՀՀ վերաքննիչ քաղաքացիական դատարան, թե թերությունները վերացնելուց հետո կրկին հայցադիմում է ներկայացրել առաջին ատյանի դատարան:
Հիշեցնենք, որ հայցադիմումը վերադարձնելու մասին որոշումը ստանալու պահից եռօրյա ժամկետում հայցվորը կարող էր թերությունները վերացնել և այն կրկին ներկայացնել դատարան: Այլապես, հայցվորը կարող էր որոշումը ստանալուց հետո յոթնօրյա ժամկետում բողոքարկել այն ՀՀ վերաքննիչ քաղաքացիական դատարան, – այս մասին տեղեկացնում է Iravaban.net-ը:
