Ուկրաինայի նախագահ Վլադիմիր Զելենսկին հայտարարել է, որ չի հասկանում, թե որոնք են Մոսկվայի պահանջները՝ Կիևի նկատմամբ։ Այս մասին հայտնում է «ՏԱՍՍ» լրատվական գործակալությունը:

«Մենք չենք հարձակվում Ռուսաստանի վրա, չենք պատրաստվում հարձակվել նրա վրա: Մենք ՆԱՏՕ-ի անդա՞մ ենք՝ ոչ, միջուկային զենք ունե՞նք՝ ոչ, ի՞նչ ասեմ, ո՞ւմ պետք է ես ինչ-որ բան տամ»,- ասել է Ուկրաինայի ղեկավարը այսօր՝ մարտի 3-ին, արտասահմանյան լրատվամիջոցներին տված հարցազրույցում՝ պատասխանելով այն հարցին, թե Կիևը պատրա՞ստ է Մոսկվային երաշխիքներ տալ։

Հիշեցնենք, որ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես է եկել ուղերձով՝ հայտնելով Դոնբասում հատուկ ռազմական օպերացիա սկսելու որոշման մասին։

«Հանգամանքները մեզնից պահանջում են վճռական ու անհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում:

Ուկրաինայի զինված ուժերի գլխավոր շտաբը հայտնել է, որ հինգշաբթի ժամը 5:00-ից (Երևանի ժամանակով 7:00-ից) ՌԴ ԶՈւ-ն ինտենսիվ հարձակումներ է իրականացնում ուկրաինական ռազմական օբյեկտների և օդանավակայանների վրա։