Զինծառայող Լյուքս Ստեփանյանի սպանության մեջ մեղադրվող Դավիթ Խաչատրյանը կարել է բերանը՝ ի նշան բողոքի: Այս մասին Իրավաբան.net-ին հայտնեց վերջինիս պաշտպան Երեմ Սարգսյանը: Նա նշեց, որ Դավիթին դեռևս չի տեսել, բայց զրուցել է նրա ծնողների հետ:
«Դավիթը շատ վճռական է տրամադրված: Այս անարդարությունների դեմ պայքարելու այլ տարեբարկ չի գտել, քան բերանը կարելը»,- ասաց պաշտպանը: Հիշեցնենք, որ վերջին դատական նիստի ժամանակ մեղադրող Արթուր Զաքարյանը ներկայացրեց մեղադրական ճառը՝ պահանջելով Դավիթ Խաչատրյանին դատապարտել 18 տարվա ազատազրկման:
Ամբաստանյալն էլ իր հերթին հանդես էր եկել հայտարարությամբ՝ նշելով, որ իրեն դատում են իր չարածի համար. «Ինձ դատեք նրա համար, ինչ ես արել եմ: Ու այս պահից ես հացադուլ եմ հայտարարում»: Հենց նույն պահանջով էլ Դավիթ Խաչատրյանը դիմում էր գրել ՀՀ նախագահ Սերժ Սարգսյանին, Տավուշի մարզի ընդհանուր իրավասության դատարանին, Մարդու իրավունքների պաշտպանին, ՀՀ գլխավոր դատախազին:
