Ժամկետային զինծառայող Լյուքս Ստեփանյանի սպանության գործով այսօր դատարանում ցուցմունք տվեց ամբաստանյալ Դավիթ Խաչատրյանը: Նա չափազանց հուզված էր և հազիվ լսելի ձայնով էր խոսում: Թեև պաշտպանները նախքան դատական նիստը հինգ րոպեով տեսակցել էին Դավիթ Խաչատրյանի հետ, պաշտպան Երեմ Սարգսյանը դատարանին խնդրեց տասնհինգ րոպե հետաձգել նիստը և հնարավորություն տալ հոգեբանորեն նախապատրաստել նրան, որպեսզի կարողանա դատարանում ցուցմունք տալ:
«Ինչ էլ որ ասեմ, չի նշանակում, որ Լյուքսի մահվան ու Հրաչոյի վիրավորվելու մեջ ես մեղք չունեմ: Ամեն ինչ կտայի, որ այդպիսի բան չլիներ»,- ասաց Դավիթ Խաչատրյանը:
Նա ընդունեց, որ իր ապօրինի գործողությունների արդյունքում է սպանվել Լյուքս Ստեփանյանը և վիրավորվել Հրաչյա Սարգսյանը, սակայն դատարանին ասաց, որ ինքը դիտավորություն չի ունեցել, չի ցանկացել որևէ մեկին կյանքից զրկել կամ վնաս պատճառել: Նրա խոսքով՝ ինքը Լյուքսը և Հրաչյան ընկերներ են եղել, մի ընտանիքի նման: Պատասխանելով իր պաշտպանի հարցերին, Դավիթ Խաչատրյանը ասաց, որ կրակոցը պատահական է եղել, նա ընդամնեը ցանկացել է վախեցնել, սակայն զենքը իջեցնելիս ինքնաձիգը դիպել է ենթապայուսակին, ձգանը քաշվել է և կրակոց է հնչել: Պաշտպանները բազմաթիվ հարցեր ուղղեցին ամբաստանյալին, այնքան, որ մեղադրողներին և տուժող կողմին այլևս հարց չմնաց տալու: Նրանք ըստ էության կրկնում էին արդեն պաշտպանների տված հարցերը, ինչի դեմ էլ պաշտպանական կողմը մի քանի անգամ առարկեց, իսկ դատարանը ընդունեց առարկությունները:
Երեմ Սարգսյանի կարծիքով նախաքննության ընթացքում խախտվել են իր պաշտպանյալի իրավունքները: Քննիչը չի բացատրել կասկածյալին նրա իրավունքները, հնարավորություն չի տվել նրան ամբողջական ցուցմունք տալ, ինչպես դա արվեց դատարանում, այլ միանգամից սկսել է հարցեր տալ: Պաշտպանները բացարկ հայտնեցին մեղադրողներին, սակայն դատարանը միջնորդությունը մերժեց՝ համարելով այն անհիմն:
Քանի որ Դավիթ Խաչատրյանի նախաքննության և դատարանում տված ցուցմունքների միջև կային էական հակասություններ, պաշտպանական կողմը միջնորդեց հրապարակել Դավիթ Խաչատրյանի նախաքննական ցուցմունքը և հարցաքննության տեսաձայնագրությունը:
Պաշտպան Վաղինակ Գևորգյանը միջնորդեց դատարանին հրապարակել նաև գործով վկաներ Միշա Ջանազյանի, Արշակ Պետրոսյանի և Հրաչյա Մարգարյանի հետ առերեսման արձանագրությունները և նրանց կրկին դատարան հրավիրել: Դատարանը բավարարեց միայն առերեսման արձանագրությունները հրապարակելու միջնորդությունը:
Դատավարությունը կշարունակվի ապրիլի 17-ին:
Հանրային թղթակից՝ Վահագն Թամրազյան
