Ժամկետային զինծառայող Լյուքս Ստեփանյանի սպանության գործի դատաքննությունն ավարտվեց: Սկսվեց դատական վիճաբանությունների փուլը:
Այսօրվա դատական նիստի ժամանակ հարցաքննվեցին պաշտպանական կողմի միջնորդությամբ դատարան հրավիրված դատաբժշկական, դատաձգաբանական համալիր փորձաքննություն իրականացրած երեք փորձագետները:
Պաշտպանական կողմը հակասություն է տեսնում վկաների ցուցմունքների և փորձագիտական եզրակացության որոշ կետերի միջև: Գործով մեղադրողները, ինչպես նաև տուժողի իրավահաջորդը և վերջնիս ներկայացուցիչը փորձագետներին հարցեր չուղղեցին: Նրանց հարցեր տվեց միայն ամբաստանյալի պաշտպան Երեմ Սարգսյանը:
Այսօրվա դատական նիստի ժամանակ միջադեպ տեղի ունեցավ պաշտպան Երեմ Սարգսյանի և Լյուքս Ստեփանյանի հոր՝ Իշխան Ստեփանյանի միջև:
Երբ պաշտպան Երեմ Սարգսյանը հարց էր տալիս փորձագետ Ա. Համբարձումյանին, դատարանի դահլիճից պաշտպանին մոտեցավ Լյուքս Ստեփանյանի հայրը և պահանջեց նման հարցեր չտալ: Պաշտպանը փորձագետին հարցնում էր Լյուքսի գլխի դիրքի, ստացած վնասվածքների մասին:
Իշխան Ստեփանյանի կարծիքով՝ պաշտպանը չպետք է որդեկորույս մոր ներկայությամբ նման հարցեր տար: Նա վիրավորական արտահայտություններ արեց պաշտպանի հասցեին, որոնք վերածվեցին հայհոյանքների:
Դատական կարգադրիչները Իշխան Ստեփանյանին դուրս հանեցին նիստերի դահլիճից: Դատարանը վերջինիս զրկեց հետագա դատական նիստերին ներկա գտնվելու իրավունքից: Նիստը նախագահող դատավոր Զոյա Զաքինյանը ստիված էր դատարանի դահլիճից հեռացնել Իշխան Ստեփանյանի մի քանի հարազատների նույնպես, ովքեր սկսեցին կարգ խախտել՝ տեղից ռեպլիկներ անելով:
Փորձագետների հարցաքննություններից հետո հանդես գալով հայտարարությամբ՝ պաշտպան Երեմ Սարգսյանը ասաց, որ փորձագետների եզրակացությունը հավաստի չէ և որևէ կերպ այն չի կարելի հիմնավորված համարել:
Դատական հաջորդ նիստը նշանակվեց մայիսի 8-ին:
Հանրային թղթակից՝ Վահագն Թամրազյան
