Աջափնյակ և Դավթաշեն վարչական շրջանների ընդհանուր իրավասության դատարանում 22-ամյա մատուցողուհի Մարիամ Հունանյանի սպանության մեջ մեղադրվող Դավիթ Թամրազյանը դատարան բերվեց ուշացումով:
Այլ գործով դատարան տեղափոխվող կալանավորներից մեկն ասեղներ էր կուլ տվել և ուղեկցող գումարտակը ժամանակին չէր կարողացել կալանավորին տեղափոխել դատարան:
Թեև մեկ ժամ ուշացումով, բայց այնուամենայնիվ դատական նիստը սկսվեց: Ամբաստանյալը ևս մեկ անգամ նշեց, որ ինքը հրաժարվել է իր փաստաբան Նիկոլայ Բաղդասարյանի ծառայություններից և այսուհետ նրա շահերը կպաշտպանեն փաստաբաններ Վահագն Բաբայանը և Կրոմվել Գրիգորյանը: Քանի որ վերջիններս չէին հասցրել գործի նյութերին ծանոթանալ՝ վատ պատճենահանված լինելու պատճառով, դատավոր Դավիթ Բալայանը դատական նիստը հետաձգեց և ժամանակ տրամադրեց պաշտպաններին:
Հաջորդ նիստը տեղի կունենա մայիսի 13-ին:
Արև Ավագյան
