Հայաստանի Հանրապետության քաղաքացիությունը ձեռք բերելը սահմանված է օրենսդրությամբ և ենթակա է որոշակի պայմանների։ Ստորև ներկայացված են հիմնական կանոնները, որոնց պետք է ծանոթ լինի յուրաքանչյուր քաղաքացիություն հայցող անձ։
Ովքե՞ր կարող են դիմել ՀՀ քաղաքացիություն ստանալու համար
ՀՀ քաղաքացիություն չունեցող, 18 տարին լրացած և գործունակ յուրաքանչյուր անձ կարող է դիմել քաղաքացիություն ստանալու համար, եթե․
- վերջին երեք տարին մշտապես բնակվել է Հայաստանում,
- կարող է բացատրվել հայերեն լեզվով,
- ծանոթ է ՀՀ Սահմանադրությանը։
Ո՞ր դեպքերում կարելի է ստանալ քաղաքացիություն առանց այս պայմանների
Օրենքը նախատեսում է որոշ բացառություններ․
- Ամուսնություն․ եթե անձը վերջին 2 տարվա ընթացքում ամուսնացած է եղել ՀՀ քաղաքացու հետ և այդ ընթացքում առնվազն 365 օր բնակվել է Հայաստանում, կամ ունի ՀՀ քաղաքացի ծնող կամ զավակ։
- Ծնողների քաղաքացիություն․ եթե ծնողները կամ նրանցից մեկը նախկինում ունեցել են ՀՀ քաղաքացիություն, իսկ դիմորդը վերջին 1 տարին մշտապես բնակվել է Հայաստանում։
- Քաղաքացիությունից հրաժարված անձինք․ եթե 1995 թվականի հունվարի 1-ից հետ հրաժարվել են ՀՀ քաղաքացիությունից և ցանկանում են վերականգնել այն։
- Փախստականներ և քաղաքացիություն չունեցողներ․ եթե Հայաստանում ճանաչվել են փախստական կամ բնակվում են որպես քաղաքացիություն չունեցող անձ։
- Ազգությամբ հայեր և անգործունակներ․ ազգությամբ հայ անձինք կամ անգործունակ անձինք, որոնց խնամակալը ՀՀ քաղաքացի է։
- Բացառիկ ծառայություններ ունեցող անձինք․ ՀՀ-ին մատուցած բացառիկ ծառայությունների կամ տնտեսության, գիտության, կրթության, մշակույթի, առողջապահության, սպորտի ոլորտներում նշանակալի ավանդի դեպքում։
Ո՞վ է որոշում քաղաքացիություն շնորհելը
- Քաղաքացիություն ստանում են քաղաքացիություն շնորհելու մասին Հայաստանի Հանրապետության Նախագահի հրամանագրով:
- Դիմումները ներկայացվում են ՀՀ կառավարության լիազոր մարմնին։
Կարո՞ղ է դիմումը մերժվել
Այո՛։ Դիմումը մերժվում է, եթե անձը․
- իր գործունեությամբ վնասում է կամ առկա է հիմնավոր կասկած, որ կարող է վնասել պետական ու հասարակական անվտանգությանը,
- սպառնում է հասարակական կարգին, առողջությանը, բարքերին, այլոց իրավունքներին և ազատություններին, պատվին և բարի համբավին։
Դիմումի մերժումը կարող է նաև չհիմնավորվել։
Ի՞նչ երդում է տալիս քաղաքացիություն ստացող անձը
Քաղաքացիություն ստանալուց առաջ անձը տալիս է երդում․
- հավատարիմ լինել Հայաստանին,
- պահպանել Սահմանադրությունը և օրենքները,
- պաշտպանել անկախությունն ու տարածքային ամբողջականությունը,
- հարգել պետական լեզուն, մշակույթն ու սովորույթները։
Երդումը ստորագրվում է և կատարվում է պաշտոնական արարողության ժամանակ։
Որտե՞ղ է անցկացվում երդման արարողությունը
- Հայաստանում գտնվողները մասնակցում են ՀՀ կառավարության լիազոր մարմնի կազմակերպած արարողությանը։
- Արտերկրում գտնվողները ներկայանում են ՀՀ դեսպանություն կամ հյուպատոսական հիմնարկ։
Ի՞նչ են տրամադրում քաղաքացիություն ստացող անձին
- ՀՀ Սահմանադրություն,
- ՀՀ քաղաքացու անձնագիր։
Հիմնական դրույթներ, որ պետք է հաշվի առնել
- Քաղաքացիություն ստանալու գործընթացը կախված է անձի կարգավիճակից և նախկին կապերից Հայաստանի հետ։
- Բացառիկ դեպքերում քաղաքացիություն կարելի է ստանալ նաև առանց հիմնական պահանջները կատարելու։
- Երդման արարողությունը քաղաքացիություն ստանալու կարևոր փուլ է։
Հավելյալ տեղեկությունների համար կարող եք այցելել Իրավաբան.net մասնագիտական առցանց մեդիա։
Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։ Կոնկրետ իրավիճակներում իրավաբանական խորհրդատվություն ստանալու համար անհրաժեշտ է դիմել մասնագետի։
