Այս հարցերի պատասխանը սահմանված է ՀՀ քաղաքացիական օրենսգրքով։ Ժառանգության հարցը վաղ թե ուշ կարող է կանգնել յուրաքանչյուրի առջև․ դա կարող է կապված լինել ծնողների, հարազատների կամ անգամ մեր սեփական գույքի հետ։ Օրենքը հստակ սահմանում է՝ ինչ է համարվում ժառանգություն, ինչպես է այն բացվում և ովքեր կարող են լինել ժառանգ։ Իրավական գիտելիքը անհրաժեշտ է, որպեսզի չկորցնեք Ձեր ժառանգության իրավունքները

 Ի՞նչ է ժառանգությունը

Օրենքի համաձայն՝ մարդու մահից հետո նրա ողջ գույքը (տուն, հողամաս, դրամ, արժեթղթեր, պարտքեր և այլն) մեկ միասնական ամբողջությամբ անցնում է այլ անձանց։ Սա կոչվում է համապարփակ իրավահաջորդություն։

 Ժառանգության հիմքերը

• Կտակով– եթե ժառանգատուն կենդանության օրոք կազմել է կտակ, ապա գույքը բաժանվում է ըստ նրա կամքի։
• Ըստ օրենքի– եթե կտակ չկա կամ կտակում չի նշված ամբողջ գույքը, ժառանգությունն իրականացվում է օրենքով սահմանված հերթականությամբ։

 Ինչ է մտնում ժառանգության մեջ

Ժառանգության զանգվածի մեջ են մտնում․

• Անշարժ գույք, դրամ, արժեթղթեր։
• Գույքային իրավունքներ և պարտականություններ։

Չեն ժառանգվում այն իրավունքներն ու պարտականությունները, որոնք անձի հետ անքակտելիորեն կապված են․ օրինակ՝ ալիմենտի իրավունքները, կյանքին կամ առողջությանը պատճառված վնասի փոխհատուցումը, անձնական ոչ գույքային իրավունքները։

 Ե՞րբ է բացվում ժառանգությունը

Ժառանգությունը բացվում է անձի մահվան օրից։ Եթե անձը դատարանի որոշմամբ է մահացած ճանաչվել, ժառանգությունը բացվում է այդ որոշման օրինական ուժի մեջ մտնելու օրը։

 Որտե՞ղ է բացվում ժառանգությունը

Ժառանգության բացման վայրը համարվում է մահացածի վերջին բնակության վայրը։ Եթե դա անհայտ է, ապա հաշվի է առնվում նրա անշարժ գույքի գտնվելու վայրը։

 Ովքե՞ր կարող են լինել ժառանգներ

• Մահացածի մահվան պահին կենդանի անձինք։
• Սաղմնավորված և ժառանգության բացվելուց հետո ծնված երեխաները։
• Կտակի դեպքում նաև իրավաբանական անձինք, համայնքներ, պետություն, օտարերկրյա կազմակերպություններ։

Անարժան ժառանգներ

Օրենքը նախատեսում է դեպքեր, երբ որոշ մարդիկ կարող են զրկվել ժառանգությունից․

• Եթե դիտավորյալ խոչընդոտել են ժառանգատուի կամքը կամ մահափորձ են կատարել նրա կամ այլ ժառանգի նկատմամբ։
• Ծնողական իրավունքներից զրկված ծնողները։
• Անարժան ժառանգներին ժառանգությունից մեկուսացնելու համար հիմք են դատարանի` օրինական ուժի մեջ մտած դատավճիռը և (կամ) վճիռը:

Կարևոր է իմանալ․ ժառանգությունը պետք է ընդունել ժառանգության բացման օրվանից վեց ամսվա ընթացքում։