«Սա ընդհանրապես մեղադրանքի մեջ չպետք է լինի, գրվել է նրա համար, որ ուռճացվի, ֆոն ստեղծի»․ Արուսյակ Ալեքսանյանի պաշտպան Երեմ Սարգսյանի եզրափակիչ ելույթը՝ դատարանում

Հակակոռուպցիոն քրեական դատարանում ապրիլի 3-ին շարունակվեց դատավոր Արուսյակ Ալեքսանյանի, նրա օգնական Թամարա Պետրոսյանի և փաստաբան Էրիկ Ալեքսանյանի գործով դատաքննությունը։ Նիստը նախագահում է  դատավոր Վահե Դոլմազյանը։

Բարձրագույն դատական խորհուրդը 2022 թվականի հոկտեմբերի 17-ին բավարարել է դատավոր Արուսյակ Ալեքսանյանի նկատմամբ քրեական հետապնդում հարուցելու և ազատությունից զրկելուն համաձայնություն տալու վերաբերյալ Գլխավոր դատախազության միջնորդությունները: Նույն գործի շրջանակներում մեղադրանք է առաջադրվել նաև փաստաբան Էրիկ Ալեքսանյանին՝ Քրեական օրենսգրքի 46-441-րդ հոդվածով, այն է՝ օժանդակել է պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելուն կամ լիազորություններն անցնելուն։ Այս գործի շրջանակներում մեղադրանք է առաջադրվել նաև Արուսյակ Ալեքսանյանի օգնական Թամարա Պետրոսյանին։

Ըստ մեղադրանքի՝ դատավորն ակնհայտ անարդար դատական ակտ է կայացրել և չարաշահել պաշտոնեական լիազորությունները։ Նա բավարարել է «Ֆազ» մականունով հայտնի քրեական հեղինակություն համարվող Սերգեյ Գրիգորյանի պաշտպան Էրիկ Ալեքսանյանի միջնորդությունը, փոխել է վերջինիս խափանման միջոցը և 2,5 մլն դրամ գրավի դիմաց նրան ազատել կալանքից։ Սերգեյ Գրիգորյանն Արուսյակ Ալեքսանյանի եղբոր՝ Ռուստամ Ալեքսանյանի ընկերն է։

Iravaban.net-ի փոխանցմամբ՝ այս նիստին եզրափակիչ ելույթով հանդես եկավ Արուսյակ Ալեքսանյանի պաշտպաններից Երեմ Սարգսյանը։ Նա իր ելույթում անդրադարձավ Արուսյակ Ալեքսանյանին առաջադրված մեղադրանքի իրավական հիմքերին ու դրանց միջև տարանջատվածության խնդրին։

Ըստ մեղադրանքի Արուսյակ Ալեքսանյանի օգնականը՝ Թամարա Պետրոսյանն օժանդակել է դատավորին անարդար դատական ակտ կայացնելուն, սակայն պաշտպանն ընդգծեց՝ այդ ամենի համար վերջինս պետք է համապատասխան լիազորություն ունենար, պետք է նշվեր, թե նա ինչ կապ ունի Սերգեյ Գրիգորյանին կալանքից ազատելու և ակնհայտ անարդար դատական ակտ կայացնելու հետ․ «Կա՞ մեկը, որ առաջին հայացքից կարող է ասել՝ դատավորի օգնականն օրենքով սահմանված որևէ լիազորություն ունի, որպեսզի կալանքից ազատի»։

Պաշտպանի խոսքով՝ որպեսզի Թամարա Պետրոսյանը խմբի կազմում ենթադրյալ հանցանքի համար լինի համակատարող, պետք է լիներ հատուկ սուբյեկտ, նաև խոսեց դատավորի օգնականի և գրասենյակի աշխատակցի կողմից դատավորի գործողությունները փոխլրացնելով իրականացնելու մասին․ «Ո՞նց կարելի ա օգնականի համար փոխլրացում բառը դնել ու ասել, որ դատավորի՝ որպես արդարադատություն իրականացնող բացառիկ լիազորություն ունեցող սուբյեկտին պաշտոնական լիազորություն է փոխլրացրել, լո՞ւրջ»։

Երեմ Սարգսյանը հղում կատարեց օրենսդրական այն նորմերին, որոնցով ձևակերպվում են հատուկ սուբյեկտ, համակատարող, օժանդակող լինելու հիմքերը, նաև նշեց դատավորի օգնականին վերագրվող պարտականություններն ու լիազորությունները, որոնցով վերջինս կատարում է դատավորի հանձնարարականները, ու  ինչ էլ այդ ամենի մեջ ներառված լինի, դրանց իրագործումը բնորոշ է օժանդակության հատկանիշներին և ոչ թե համակատարող լինելուն։

Արուսյակ Ալեքսանյանին մեղսագրվող պաշտոնական լիազորությունների ենթադրյալ անցման դրվագի վերաբերյալ հետևյալը նշեց․ «Ասում են՝ այն, որ ինքը ակնհայտ անարդար դատական ակտ է կայացրել, այդկերպ, ինչպես նաև դատավորի հասցեին անպարկեշտ արտահայտություններ անելով հեղինակազրկել է դատական իշխանությանը․ հիմա առաջին մասը մոռանանք․ սա հանցագործության օբյեկտիվ կողմի մա՞ս ա, լիազորություններն անցնելու մա՞ս ա էդ անպարկեշտ արտահայտություն անելը։ Ո՞նց եք սա բերում, տեղավորում պաշտոնական լիազորության անցման մեջ, սա ընդհանրապես մեղադրանքի մեջ չպետք է լինի, գրվել է նրա համար, որ ուռճացվի, ֆոն ստեղծի»։

Պաշտպանը անդրադարձավ ՕՀՄ անցկացման ընթացակարգին ու դրա օրինականությանը․ «Եթե ոչ միջին ծանրության հանցանք ա, թույլատրվու՞ւմ էր ՕՀ միջոցառում անել, չէր թույլատրվում, այսինքն՝ եթե բարեխիղճ, օբյեկտիվ լինեին, կպարզվեր, որ իրավունք չունեին դա անելու, բայց օրենքը նախատեսում ա, որ հնարավոր է՝ սկզբից ուրիշ բան ես ունեցել, հետո ուրիշ բան ես ստացել, էդ ուրիշ բանը պիտի գնահատենք։ Հիմա, եթե չունի և եթե այս ՕՀՄ-ները չեն կարող արտավարույթային փաստաթուղթ ընդունել, ո՞նց են արտավարույթային փաստաթուղթ ճանաչել։ Միջնորդում եմ, որ էս հիմքով դրանք անթույլատրելի ապացույց ճանաչվեն»։

Փաստաբանի խոսքով՝ ակնհայտ անարդար դատական ակտ կայացնելու համար քրեական վարույթը նախաձեռնվել է այն պարագայում, երբ դատական ակտը օրինական ուժի մեջ էր մտել ու չէր բեկանվել, այս առումով նա վկայակոչեց վերաքննիչ դատարանի որոշումներից, նշեց՝ առանց ապացույցների հետազոտման, քերական հետապնդումը պետք է դադարեցվեր։

Եզրափակիչ ելույթում պաշտպանը խոսեց նաև մինչև ԲԴԽ համաձայնություն տալը Արուսյակ Ալեքսանյանի նկատմամբ իրականացված քրեական հետապնդման մասին՝ բարձրաձայնելով այն հարցը, թե արդյոք այս իրավունքը երաշխավորվել է։

«Միայն այն հիմքով, որ Արուսյակ Ալեքսանյանի նկատմամբ առանց ԲԴԽ համաձայնության է քրեական հետապնդում հարուցվել, նշանակում է, որ այս ամբողջ վարույթն ապօրինի է։ 4 հատոր գործ են քննել Արուսյակ Ալեքսանյանի վերաբերյալ, կաշառքից բացի ամեն ինչ քննել են, ընդհուպ քննել են, թե ընտանիքի անդամները որտեղ հողակտոր ունեն, ինչ մեքենա են վաճառել, հայտարարագրում գրել են դրա մասին, թե ով, երբ Հայաստանից գնաց-եկավ։ Այս ամենը պետք էր քննել, ավարտել, հետո գալ, ասել՝ ԲԴԽ թույլտվություն տո՞ւր, այսինքն՝ դատավորները ո՞նց կարող են անկախ լինեն, կաշկանդված չլինել որևէ պետական մարմնից»,-ասաց Սարգսյանը։

Գործով հաջորդ նիստին եզրափակիչ ելույթով հանդես կգա Արուսյակ Ալեքսանյանի մյուս պաշտպան Հովսեփ Սարգսյանը։

Հաջորդ նիստը՝ ապրիլի 14-ին։

Մանրամասները՝ տեսանյութերում։

Մարիամ Շահնազարյան

Իրավաբան.net

Հետևեք մեզ Facebook-ում

  Պատուհանը կփակվի 6 վայրկյանից...   Փակել