Iravaban.net–ը ուսումնասիրել է Բարձրագույն դատական խորհրդի թիվ ԲԴԽ-74-Ո-137 որոշումը, որով Հակակոռուպցիոն դատարանի դատավորներ Խաչիկ Ղազարյանին, Վահե Դոլմազյանին, Տիգրան Դավթյանին, Մերի Մոսինյանին և Սարգիս Դադոյանին բաշխվելիք գործերի համար սահմանվել է առանձին տոկոսաչափ:
Որոշման հիմքերը և նպատակը
ԲԴԽ-ն որոշումը կայացրել է՝ քննարկելով Հակակոռուպցիոն դատարանի դատավորների աշխատանքային ծանրաբեռնվածության վերաբերյալ գրությունները և ղեկավարվելով «Հայաստանի Հանրապետության դատական օրենսգիրք» սահմանադրական օրենքի 42-րդ հոդվածի 2-րդ մասով ու 94-րդ հոդվածի 1-ին մասով:
Սահմանված տոկոսաչափերը և ժամկետները
Որոշմամբ սահմանվել են հետևյալ տոկոսաչափերը.
- Խաչիկ Ղազարյան (դատարանի նախագահ) – բաշխվելիք գործերի համար հավասարաչափ բաշխման չափանիշներից սահմանվել է 90%-ի չափով նվազեցման տոկոսաչափ (ներառյալ՝ «Դատական օրենսգրքի» 45-րդ հոդվածի 1-ին մասի 4-րդ ենթակետով նախատեսված 30%-ի չափով նվազեցման տոկոսաչափը): Ժամկետը՝ 2025 թվականի հոկտեմբերի 21-ից մինչև 2026 թվականի ապրիլի 20-ը ներառյալ:
- Սարգիս Դադոյան– բաշխվելիք գործերի համար հավասարաչափ բաշխման չափանիշներից սահմանվել է 70%-ի չափով նվազեցման տոկոսաչափ: Ժամկետը՝ 2025 թվականի հոկտեմբերի 21-ից մինչև 2026 թվականի փետրվարի 20-ը ներառյալ:
- Վահե Դոլմազյան, Տիգրան Դավթյան և Մերի Մոսինյան – բաշխվելիք գործերի համար հավասարաչափ բաշխման չափանիշներից սահմանվել է 70%-ի չափով նվազեցման տոկոսաչափ: Ժամկետը՝ 2025 թվականի նոյեմբերի 3-ից մինչև 2026 թվականի մարտի 2-ը ներառյալ:
Որոշման ուժի մեջ մտնելը
Որոշումն ուժի մեջ է մտնում հրապարակմանը հաջորդող օրվանից, այսինքն՝ 2025 թվականի հոկտեմբերի 21-ից: Որոշումը ստորագրել է ԲԴԽ նախագահ Արթուր Աթաբեկյանը:
Այսպիսով, Հակակոռուպցիոն դատարանի նշված դատավորները կունենան զգալիորեն նվազեցված գործերի քանակ՝ կապված նրանց ծանրաբեռնվածության հետ,- տեղեկացնում է Iravaban.net-ը:
