TK-Progress-ի գործադիր տնօրեն Սուրեն Գրիգորյանը հերքել է ՌԴ ՊՆ-ից 7 միլիոն ռուբլու չափով գումար հափշտակելու մեղադրանքը։ Այս մասին հայտնում է ՏԱՍՍ-ը՝ իրավապահ մարմիններին հղումով։
«Գրիգորյանն առաջին հարցաքննության ժամանակ հայտարարել է, որ չի հասկանում, թե ինչում են իրեն կասկածում, քանի որ բյուջեի միջոցներ չի գողացել և հանցագործություն չի կատարել։ Միաժամանակ նա վստահեցրել է, որ չի պատրաստվում թաքնվել, իսկ կալանքը համարել է իր նկատմամբ խիստ միջոց»,- գործակալությանը հայտնել է ուժայինների ներկայացուցիչը։
Նշված է նաև, որ Գրիգորյանն այժմ մեղադրվում է առանձնապես խոշոր չափերով խարդախության համար։ Բացի այդ, հետաքննության արդյունքներով նրան կարող են մեղադրանք առաջադրել նաև ՊՆ Կադրերի գլխավոր վարչության նախկին պետ, գեներալ-լեյտենանտ Յուրի Կուզնեցովին կաշառք տալու համար։
Ենթադրվում է, որ նա կարող էր դա անել Կրասնոդարում կուրսանտների համար նախատեսված հանրակացարանի վերակառուցման պայմանագիր ձեռք բերելու համար, որը գողացվել էր։
Ավելի վաղ Կրասնոդարում ձերբակալվել էր գործարար Գրիգորյանը ՌԴ ՊՆ-ից ավելի քան յոթ միլիոն ռուբլի հափշտակելու համար։ Հետաքննության տվյալներով՝ անցյալ տարի նրա ընկերությունը պետք է վերանորոգեր Կրասնոդարի բարձրագույն զինվորական դպրոցի հանրակացարանը՝ պաշտպանության պետական պատվերի շրջանակներում։ Գրիգորյանը ստացել է 7,2 մլն ռուբլի, սակայն աշխատանքը չի ավարտել։
