Ուկրաինացի ազգայնականները պատանդ են պահում ավելի քան 6,5 հազար օտարերկրացիների: Այս մասին այսօր՝ ապրիլի 4-ին, հայտնել է Ռուսաստանի Պաշտպանության ազգային վերահսկողության կենտրոնի ղեկավար, գեներալ-գնդապետ Միխայիլ Միզինցևը, փոխանցում է ТАСС լրատվական գործակալությունը:
«Ուկրաինացի ազգայնականները շարունակում են պատանդ պահել 16 պետությունների 6501 օտարերկրյա քաղաքացու՝ որպես կենդանի վահան», – ասել է Միզինցևը։
Նրա խոսքով՝ ուկրաինական նավահանգիստներում շարունակում են արգելափակված մնալ ավելի քան 60 արտասահմանյան նավ։ Հրետակոծության սպառնալիքը և պաշտոնական Կիևի ստեղծած բարձր ականային վտանգը նրա ներքին ջրերում և տարածքային ծովում թույլ չեն տալիս նավերին ապահով դուրս գալ բաց ծով։
Հիշեցնենք, որ փետրվարի 24-ին՝ վաղ առավոտյան, Ռուսաստանի նախագահ Վլադիմիր Պուտինը հայտարարել էր, որ սկսում է հատուկ ռազմական գործողություն Ուկրաինայի տարածքում, որի խնդիրն է ապահովել Դոնեցկի և Լուգանսկի հանրապետությունների անվտանգությունը, ինչպես նաև հեռացնել Ուկրաինայի «նացիստական ռեժիմը»:
ԱՄՆ-ն ու ԵՄ-ն գնահատել են ՌԴ-ի այս քայլն իբրև Ռուսաստանի կողմից ուղղակի ագրեսիա ընդդեմ Ուկրաինայի տարածքային ամբողջականության և ինքնիշխանության։
Գերագույն Ռադան Ուկրաինայում ռազմական դրություն է մտցրել։
