«Լիլ, մի բան ասեմ` դու միշտ հիշի՝ մեր ամենամոտ ու ամենահավատարիմ ընկերները մեր ծնողներն են և ես ու դու»,-հիշում է արցախյան պատերազմում զոհված Էդգար Զաքարյանի խոսքերը քույրը` Լիլիա Զաքարյանը և ավելացնում, որ եղբայրն իր ամենահավատարիմ ու մոտ ընկերն է, անցյալով չի խոսում էդգարի մասին:
Նա բանակ է զորակոչվել 2020 թվականի օգոստոսի 24-ին, մինչև սեպտեմբերի 15-ը եղել է կարանտինի մեջ:
Քրոջ խոսքով՝ Էդգարն այնքան բարի է եղել, որ իր հագի շորերը ցանկացել է տալ կարիքավոր երեխայի. «9 տարեկան երեխան պատրաստ էր իր հագի շորը տալ անծանոթին: Տարիներ անց էլ իր կյանքը տվեց հանուն բոլորիս»,-նշում է քույրը:
Ընկերը՝ Գարիկ Ավանեսյանն ասում է, որ Էդգարի հետ ամեն ժամը, րոպեն ու վայրկյանը ուրախ է անցել:
«Էդգարի նման ընկերներ քիչ են լինում, ես այն քիչ բախտավորներից եմ, որ նրա հետ շփվել եմ: Անհնար էր նրա ներկայությամբ անտրամադիր լինել: Պատերազմի ժամանակ շատ անհանգիստ էի իր համար, ճանաչելով իր տեսակը վստահ էի, որ հանուն թասիբի, ինքնասիրության ամեն ինչի պատրաստ է»,-պատմում է ընկերը՝ Էմիլ Գրիգորյանը:
Էդգար Զաքարյանը ծնվել է 2002 թվականի մարտի 18-ին: Զոհվել է 2020 թվականի հոկտեմբերի 9-ին:
