Հայկական և ադրբեջանական կողմերի ռազմագերիների փոխանակման գործընթացը շարունակվում է: Այսօր՝ դեկտեմբերի 16-ին, տեղի ունեցած ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
Այս մասին հայտնում է «ՏԱՍՍ» լրատվական գործակալությունը։
«Գերիների փոխանակման գործընթացը շարունակվում է», – ասել է նա:
Նա նաև ասել է, որ Լեռնային Ղարաբաղին վերաբերող բոլոր հայտարարությունները, որոնք արվել են ինչպես հակամարտության կողմերի, այնպես էլ տարածաշրջանային և ոչ տարածաշրջանային խաղացողների կողմից, պետք է ուղղված լինեն տարածաշրջանում երկարաժամկետ խաղաղությանը և հակամարտության լիարժեք կարգավորմանը:
Ըստ նրա՝ յուրաքանչյուր հայտարարություն պետք է ճշգրտորեն կշռել այն տեսանկյունից, թե դա ինչ օգուտ կամ վնաս կարող է բերել: Մամուլի խոսնակը հիշեցրել է, որ Լեռնային Ղարաբաղի կարգավորման ուղղությամբ կատարվել է ամենակարևոր և դժվարին աշխատանքը:
Նա շեշտել է, որ Մոսկվան երկխոսություն է վարում ինչպես Բաքվի, այնպես էլ Երևանի հետ՝ գոյություն ունեցող բոլոր ուղիներով: «Ուստի, ինձ թվում է, որ կողմերի միջև ծագող բոլոր հարցերը պետք է լուծվեն հենց այս ճանապարհով ՝ ելնելով իմ սկզբի ասածից և դրա համար գոյություն ունեցող ուղիներից», – եզրափակել է Զախարովան:
