Կանայք մշակում են բուրդը, թել մանում, գործում կարպետներ, հագուստներ, գեղեցիկ խաղալիքներ. Սյունիքի ամենախոշոր, սակայն բավականին անտեսված գյուղում՝ Շինուհայրում 2002 թվականին հիմնադրվեց «Բրդից մինչև կարպետ» արհեստանոցը:
Արհեստանոցը հիմնադրվել է Գորիսի Կանանց զարգացման «Ռեսուրս կենտրոն» հիմնադրամի կողմից: Տնօրեն Ռուզաննա Տոռոզյանի խոսքով, այսօր արդեն բավականին ճանաչում և հաջողություն ձեռքբերած արհեստանոցի ստեղծման նպատակը գործազրկության նվազեցումն էր, կանանց զբաղվածության խնդիրը լուծելը, և ինչու չէ՝ տնտեսական մի ողջ շղթայի զարգացումը:
Իրավաբանների հայկական ասոցիացիայի նախագահ, ԵՄ-ի ֆինանսական աջակցությամբ իրականացվող «Կառուցողական երկխոսության հանձնառություն» ծրագրի ղեկավար Կարեն Զադոյանը հունիսի 1-ին այցելեց «Բրդից մինչև կարպետ» արհեստանոց, ծանոթացավ կանանց կողմից հիմնադրված նախաձեռնության գործունեությանը և տնօրենի հետ քննարկեցին սոցիալական ձեռնարակատիրության ոլորտում առկա խնդիրները, զարգացման հնարավորությունները:
Տնօրեն Ռուզաննա Տոռոզյանը նշեց, որ Շինուհայր գյուղը հիմնականում անտեսվում էր զբոսաշրջիկների կողմից, այժմ սակայն շատերն են այցելում արհեստանոց, ծանթանում բրդի մշակման, թել մանելու և ձեռքի աշխատանքներ ստեղծելու ողջ ընթացքին, գնումներ կատարում:
Մանրամասները՝ տեսանյութում:
