Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում շարունակվեց նախկին վարչապետ և ներկայումս ԱՄՆ-ում ՀՀ դեսպան Տիգրան Սարգսյանն ընդդեմ ընդդեմ գործարար Փայլակ Հայրապետյանի գործով դատավարությունը: Գործի քննում է դատավոր Զարուհի Նախշքարյանի նախագահությամբ
Հայցվոր Տիգրան Սարգսյանի ներկայացուցիչ, փաստաբան Արամ Օրբելյանը դատարանին ներկայացրեց հայցի հիմքը, ըստ որի՝ shamshyan.com էլեկտրոնային կայքի միջոցով 2015 թվականի մարտի 24-ին լույս է տեսել սկանդալային օֆշորային գործի մասին հոդված, որտեղ հարցազրույց է տվել Փայլակ Հայրապետյանը: Տվյալ հոդվածի մեջ տեղ են գտել մի շարք արտահայտություններ, որոնք, ըստ հայցվորի ներկայացուցչի, զրպարտում են Տիգրան Սարգսյանին: Արամ Օրբելյանը նաև ներկայացրեց հայցի առարկան . «Հայցի առարկան է պարտավորեցնել Փայլակ Հայրապետյանին shamshyan.com էլեկտրոնային կայքի միջոցով հերքել զրպարտություն հանդիսացող փաստացի տվյալները: Փայլակ Հայրապետյանից հոգուտ Տիգրան Սարգսյանի բռնագանձել 1 մլն ՀՀ դրամ` որպես բարոյական վնասի փոխհատուցում, ինչպես նաև՝ լուծել դատական ծախսերի հարցը»:
Հիշյալ հոդվածում Փայլակ Հայրապետյանը, ով իր ունեզրկման հիմանական մեղավորներ է համարում Տիգրան Սարգսյանին, Նավասարդ Կճոյանին ու ադամանդագործ Աշոտ Սուքիասյանին ասել է, թե 7.5 միլիոն դոլար է նախկին վարչապետի բանկային հաշվեհամարին փոխանցվել ու այդ գումարով Սուքիասյանը 90 կգ ոսկի է գնել, ինչի սեփականատերը Տիգրան Սարգսյանն ու Նավասարդ Կճոյանն են:
Պատասխանող կողմի ներկայացուցիչ, փաստաբան Գրիշա Բալասանյանը առարկություն ներկայացրեց պահանջի դեմ, ըստ որի՝ Փայլակ Հայրապետյանը այս ընթացքում ընդամենը կրկնել է լրատվամիջոցներում հրապարակված այն տեղեկությունները, ըստ որոնց, սնանկացման հիմնական պատճառը Տիգրան Սարգսյանի, ադամանդագործ Աշոտ Սուքիասյանի և Արարատյան թեմի առաջնորդ Նավասարդ Կճոյանի հիմնած ընկերություններն են: Նա նաև հավելեց, որ այդ մասին կան բազմաթիվ հրապարակումներ և շատ լրատվամիջոցներ են անդրադարձել դրան: Նա դատարանին ներկայացրեց այն հետաքննական նյութերը, որոնք հրապարակվել են դեռևս 2013 թվականին:
Գրիշա Բալասանյանը դատարանում հայտարարեց, որ դատարանի կողմից իրենց ուղարկված հայցադիմումում որպես զրպարտչական տեղեկություն ներկայացված է միայն 2 դրվագ՝ Փայլակ Հայրապետյանի կողմից 7,5 մլն դոլար Տիգրան Սարգսյանի բանկի հաշիվին փոխանցելու և Տիգրան Սարգսյանի ժողովին մասնակցելու վերաբերյալ: Սակայն հայցվոր կողմը դատարանում ներկայացրել է ևս մեկ դրվագ` կապված 90 կգ ոսկի գնելու հետ, որը հայցադիմումում բացակայում է: Այս հանգամանքը հաշվի առնելով Գ. Բալասանյանը միջնորդեց նիստը հետաձգել, քանի որ պետք է ծանոթանա գործի նյութերին, որպեսզի կարողանա հստակ պաշտպանություն իրականացնել:
Դատարանը որոշեց միջնորդությունը բավարարել նաև այն նպատակով, որպեսզի պատասխանողը կողմնորոշվի և ավելի հստակ ներկայացնի պատասխանողի դիրքորոշումը՝ ճշմարտացի՞ են արդյոք տվյալները, թե` ոչ, եթե ոչ, ապա որ դրույթներն են կիրառելի, որպեսզի դատարանը հնարավորություն ստանա ապացուցման բեռ բաշխել: Դատաավորի խոսքով` դեռևս դատարանի համար հասկանալի չէ պատասխանողի առարկությունների էությունը:
Դատական հաջորդ նիստը նշանակվեց սեպտեմբերի 4-ին:
Ազնիվ Սիրադեղյան
