Քրեական վերաքննիչ դատարանում, դատավոր Գ. Ավետիսյանի նախագահությամբ, այսօր տեղի ունեցավ Արաբկիր բժշկական կենտրոնում մահացած 2.5 տարեկան Լիա Միսակյանի մահվան գործով դատական նիստը:
Դատական քննությունը սկսվեց միայն այն բանից հետո, երբ կողմերը տվեցին իրենց համաձայնությունը` վերաքննիչ դատարանում գործը շարունակել նույն փաստաբանների և ներկայացուցիչների հետ:
Դատավոր Գ. Ավետիսյանը ներկայացրեց առաջին ատյանի դատարանի դատավճիռը, համաձայն որի` Լիլիթ Վարդանյանը մեղավոր է ճանաչվել ՀՀ քրեական օրենսգրքի 130 հոդվածի 2-րդ մասով նախատեսված հանցանք կատարելու մեջ և դատապարտվել է ազատազրկման 2 տարի ժամկետով: Զարինե Այվազյանն էլ մեղավոր է ճանաչվել ՀՀ քրեական օրենսգրքի 130 հոդվածի 2-րդ մասով նախատեսված հանցանք կատարելու մեջ և դատապարտել ազատազրկման 2 տարի 6 ամիս ժամկետով:
Դատավճռի համաձայն ` կիրառելվել է ՀՀ Ազգային Ժողովի «Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին» 2013 թվականի հոկտեմբերի 3-ի որոշման 4-րդ կետի 1-ին ենթակետը ու Զարինե Այվազյանը և Լիլիթ Վարդանյանն ազատվել են հիմնական պատժից:
Տուժող կողմի իրավահաջորդ Արթուր Սաքունցը հանդես եկավ միջնորդությամբ` հետաձգելու դատական նիստը` մյուս կողմի վերաքննիչ բողոքին ծանոթանալու համար: Դատարանը բավարարեց Արթուր Սաքունցի միջնորդությունը: Հաշվի առնելով կողմերի ծանրաբեռնվածությունը հաջորդ դատական նիստը նշանակվեց օգոստոսի 31-ին, ժամը 11:00-ին:
Հիշեցնենք, որ 2012թ. դեկտեմբերի 31-ին 2.5 տարեկան երեխա Լիա Միսակյանը ջերմություն է ունեցել և ցնցումների մեջ եղել, շտապօգնության միջոցով նրան հայրը տեղափոխել է Արաբկիր բժշկական կենտրոն, 2013թ. հունվարի 2-ին երեխան մահացել է: Մեղադրական եզրակացության համաձայն`երեխան մահացել է Արաբկիր բհ-ի բոքսային բաժանմունքի մանկաբույժներ Լիլիթ Վարդանյանի և Զարինե Այվազյանի մասնագիտական պարտականությունները՝ ոչ պատշաճ իրականացնելու և դրանց նկատմամբ անփույթ վերաբերմունք դրսևորելու հետևանքով:
Զառա Մանուչարյան
