Սեպտեմբերի 11-ին ՀՀ ԱԺ փոխնախագահ Էդուարդ Շարմազանովն ընդունեց Ֆրանսիայի Հանրապետության խորհրդարանական պատվիրակությանը՝ ԵԱՀԿ խորհրդարանական վեհաժողովում Ֆրանսիայի պատվիրակության ղեկավար Ալեն Ներիի գլխավորությամբ: Հանդիպմանը մասնակցում էին Հայաստան-Ֆրանսիա բարեկամական խմբի ղեկավար Արա Բաբլոյանը եւ խմբի անդամ Մնացական Մնացականյանը:
ԱԺ փոխնախագահ Էդուարդ Շարմազանովը, ողջունելով ֆրանսիացի գործընկերների այցը Հայաստանի Հանրապետություն եւ Լեռնային Ղարաբաղի Հանրապետություն, գոհունակությամբ նշեց, որ երկու երկրների հարաբերությունները բարձր մակարդակի վրա են եւ շարունակում են դինամիկ զարգանալ, ինչը մասնավորապես պայմանավորված է նաեւ այն հանգամանքով, որ Հայաստանի համար հույժ կարեւորություն ունեցող ԼՂ հակամարտությունում Ֆրանսիան ԵԱՀԿ Մինսկի խմբի համանախագահ երեք երկրներից մեկն է:
Հանդիպման ընթացքում, այլ հարցերից բացի, զրուցակիցներն անդրադարձան նաեւ ԼՂ հակամարտության կարգավորման խնդրին:
Պարոն Շարմազանովը, անդրադառնալով ֆրանսիացի սոցիալիստների՝ օրեր առաջ Հայաստան կատարած այցին, կարեւորեց նրանց այն հայտարարությունները, ըստ որոնց՝ ԼՂ հակամարտությունը պետք է կարգավորվի բացառապես խաղաղ ճանապարհով, ինչպես նաեւ այն, որ Լեռնային Ղարաբաղի Հանրապետությունը պետք է ԼՂ հակամարտության կարգավորման հարցում ներգրավվի որպես բանակցային կողմ:
ԱԺ փոխնախագահը նկատեց, որ ֆրանսիացի պատգամավորների այցը Լեռնային Ղարաբաղի Հանրապետություն, լսելի է դարձնում Արցախի ժողովրդի ձայնը Եվրոպայում, ով պայքարում է իր ազատության, արդարության եւ ինքնորոշման իրավունքի ճանաչման համար:
Պատվիրակության ղեկավար Ալեն Ներին, շնորհակալություն հայտնելով ջերմ ընդունելության համար, նշեց, որ ԼՂՀ կատարած իրենց այցը անհրաժեշտ է դիտարկել մարդու եւ ժողովուրդների իրավունքների, ազգերի ինքնորոշման իրավունքի պաշտպանության տեսանկյունից, որը կարեւորում են որպես ԵԱՀԿ խորհրդարանական վեհաժողովի անդամ երկիր:
Ազգային ժողովի Հայաստան-Ֆրանսիա բարեկամական խմբի ղեկավար Արա Բաբլոյանը եւ խմբի անդամները ևս հանդիպում ունեցան Ալեն Ներիի գլխավորած պատվիրակության՝ Ֆրանսիա-Հայաստան բարեկամական խմբի անդամներ Ժան Բիզեի, Ժան-Մարկ Ժերմենի, Ժակ Ռեմիլյեի հետ:
Հայաստան-Ֆրանսիա բարեկամական խմբի ղեկավար Արա Բաբլոյանը, ողջունելով հյուրերին, շնորհակալություն հատնեց ակտիվ համագործակցության համար՝ նկատելով, որ գաղտնիք չէ, որ Ֆրանսիան Հայաստանի բարեկամ երկիրն է: Բարեկամական խմբի ղեկավարը ողջունեց նրանց այցը Արցախ եւ կարեւորեց երկու երկրների միջեւ առկա հարաբերությունների ներկայիս մակարդակը: Ալեն Ներին շնորհակալություն հայտնեց հյուրընկալության համար եւ նշեց, որ երեք օր իրենք եղել են Արցախում, որտեղից վերադարձել են տպավորված:
Ըստ Ժերմենի` իրենց այցի նպատակն է նաեւ ուղերձ հղել աշխարհին, որ Արցախում պայքար է միայն արժեքների համար` ժողովրդավարության եւ մարդու իրավունքների պաշտպանության:
Լուսանկարը՝ parliament.am-ի:
