Հայաստանում գործում է դատավորներին ծառայողական զենք պահելու և կրելու թույլտվություն տրամադրելու հատուկ ընթացակարգ: Iravaban.net-ն ուսումնասիրել է ՆԳՆ պաշտոնական փաստաթղթերը և մանրամասն ներկայացնում է, թե ինչպես է գործում այս ընթացակարգը:
Ո՞վ կարող է թույլտվություն ստանալ.
Համաձայն գործող օրենսդրության՝ ծառայողական զենք պահելու և կրելու իրավունք ունեն Հայաստանի Հանրապետության դատավորները: Այս միջոցն ուղղված է նրանց անվտանգության ապահովմանը՝ մասնագիտական պարտականությունների կատարման ընթացքում:
Ի՞նչ փաստաթղթեր են անհրաժեշտ.
Թույլտվություն ստանալու համար ոստիկանություն պետք է ներկայացվեն՝
- Բարձրագույն դատական խորհրդի միջնորդություն,
- դատավորի դիմում,
- երկու լուսանկար։
Ինչպե՞ս է ընթանում գործընթացը.
Թույլտվության ստացման գործընթացը ներառում է մի քանի փուլ՝
- Դատավորը դիմում է ներկայացնում Բարձրագույն դատական խորհուրդ,
- Բարձրագույն դատական խորհուրդը միջնորդություն է ներկայացնում ոստիկանություն՝ դատավորի դիմումի հիման վրա, վերջինիս զենք ամրակցելու համար,
- Ոստիկանությունը կատարում է փաստաթղթերի ամբողջականության, բովանդակության և այլ ստուգումներ,
- Դրական որոշման դեպքում տրվում է թույլտվություն։
Եթե փաստաթղթերում հայտնաբերվում են ոչ էական թերություններ (վրիպակներ, ոչ իրավաբանական անճշտություններ, թվաբանական սխալներ), ոստիկանությունը երկու աշխատանքային օրվա ընթացքում առաջարկում է վերացնել դրանք հինգ աշխատանքային օրվա ընթացքում:
Պահանջվո՞ւմ է արդյոք վճարում.
Ուշագրավ է, որ այս ծառայությունը տրամադրվում է անվճար՝ թույլտվության տրամադրման համար վճար նախատեսված չէ:
Իրավական հիմքերը»
Թույլտվությունների տրամադրումը կարգավորվում է հետևյալ նորմատիվ ակտերով՝
- «Զենքի շրջանառության կարգավորման մասին» ՀՀ օրենք,
- 2023 թվականի մայիսի 5-ի թիվ 4-Ն ՀՀ ներքին գործերի նախարարության ոստիկանության պետ-ներքին գործերի նախարարի տեղակալի հրաման,
- ՀՀ Կառավարության 2018 թվականի նոյեմբերի 1-ի թիվ 1222-Ն և 2023 թվականի հունիսի 1-ի թիվ 891-Ն որոշումներ։
Ի՞նչ անել մերժման դեպքում.
Մերժման դեպքում դատավորն իրավունք ունի որոշումը բողոքարկել օրենքով սահմանված կարգով:
Լրացուցիչ տեղեկությունների համար կարելի է դիմել հեռախոսով՝ +(374)10 596 147 կամ էլ. փոստով՝ [email protected]:
