Iravaban.net-ը ուսումնասիրել է Իրավական ակտերի նախագծերի հրապարակման e-draft.am կայքում հանրային քննարկման դրված «Հայաստանի Հանրապետության վարչապետի 2023 թվականի մարտի 14-ի N 270-Լ որոշման մեջ լրացումներ և փոփոխություն կատարելու մասին» Հայաստանի Հանրապետության վարչապետի որոշման նախագիծը: Նախագծով նախատեսվում է, որ որոշումն ուժի մեջ կմտնի պաշտոնական հրապարակմանը հաջորդող օրվանից:
Ի՞նչ փոփոխություններ են նախատեսվում
Նախագիծը վերաբերում է Ներքին գործերի նախարարության կանոնադրությանը, որը սահմանում է նախարարության գործառույթներն ու կառուցվածքը։ Փոփոխություններով առաջարկվում է հստակեցնել և ընդլայնել նախարարության լիազորությունները հանցավորության վիճակագրության, վերլուծության և հետազոտությունների ոլորտում։
Մասնավորապես՝
- Նախարարության գործառույթների մասին հոդվածում (կետ 11)
Ներկայիս կանոնադրությամբ ՆԳՆ արդեն իրականացնում է հանցավորության շարժընթացի վերլուծություն և հասարակական անվտանգության վիճակի գնահատում։
Նախագծով այս հոդվածը լրացվում է նոր 5․1-րդ ենթակետով, որը նախատեսում է, որ նախարարությունը նաև՝
- կիրականացնի հանցագործությունների, հանցանք կատարած անձանց, վարչական իրավախախտումների և դրանց կանխման համար անհրաժեշտ տեղեկատվության հաշվառումներ, կձևավորի միասնական հանրապետական տվյալների բազաներ և կհավաքագրի պաշտոնական վիճակագրություն։
Բացի այդ, գործող 6-րդ ենթակետը լրացվում է և դառնում է ավելի ամբողջական․ նախարարությունը ոչ միայն կվերլուծի հանցավորության վիճակը, այլև՝
- կկազմակերպի պարբերական և թեմատիկ հետազոտություններ, կվերհանի մարտահրավերներն ու ռիսկերը, և դրանց հիման վրա կհամակարգի քաղաքական որոշումների ընդունումն ու իրականացումը։
Այս փոփոխությունների նպատակն է՝
- ստեղծել միասնական և թվայնացված հանցավորության տվյալների բազա,
- ապահովել տվյալների խորքային վերլուծություն,
- ձևավորել ապացուցահեն քաղաքականություններ հանցավորության կանխարգելման և հանրային անվտանգության ոլորտում։
Կառուցվածքային ստորաբաժանումների մասին հոդվածում (կետ 33)
Նախագծով նախատեսվում է նաև նոր մասնագիտական ստորաբաժանման՝
- «Հանցավորության վիճակագրության և հետազոտական կենտրոն»-ի
ստեղծում Ներքին գործերի նախարարության կազմում։
Ու՞մ կողմից է մշակվել նախագիծը
Նախագիծը մշակվել է Հայաստանի Հանրապետության ներքին գործերի նախարարության կողմից:
