Ադրբեջանի նախագահ Իլհամ Ալիևը Ռուսաստանին կոչ է արել երկկողմանի հիմունքներով բանակցել Ղարաբաղում (Արցախ՝ խմբ․) խաղաղապահների կարգավիճակի շուրջ, ինչին համաձայնել է Հայաստանի վարչապետ Նիկոլ Փաշինյանը, ասել է ՌԴ նախագահ Վլադիմիր Պուտինը «Վալդայ» բանավիճային ակումբի նիստում, փոխանցում է РИА Новости-ն։
«Հանդիպումներից մեկի ժամանակ նախագահ Ալիևը մոտեցավ ինձ և ասաց՝ «Դե, տեսնում եք, բոլորը ընդունեցին, որ Ղարաբաղը (Արցախ՝ խմբ․) մերն է։ Ձեր զինվորականները մեր տարածքում են, եկեք հիմա պայմանավորվենք նրանց կարգավիճակի շուրջ՝ երկկողմ հիմունքներով»: Դե, վարչապետ Փաշինյանը հաստատեց դա՝ ասելով՝ «Այո, հիմա ձեզ պետք է բանակցել երկկողմ հիմունքներով»»,- ասել է Պուտինը։
ՌԴ նախագահի խոսքով՝ Ռուս խաղաղապահների կարգավիճակը փոփոխությունների է ենթարկվել Արցախ ադրբեջանական տարածք ճանաչելուց հետո։
«Նույնիսկ մեր խաղաղապահների կարգավիճակն անմիջապես փոփոխությունների ենթարկվեց այն բանից հետո, երբ Ղարաբաղի (Արցախ՝ խմբ․) ճանաչվեց որպես Ադրբեջանի մաս»,- ասել է ՌԴ նախագահը։
