ՌԴ նախագահի մամուլի խոսնակ Դմիտրի Պեսկովը մեկնաբանել է Հայաստանի վարչապետ Նիկոլ Փաշինյանի խոսքերը իտալական La Repubblica թերթին տված հարցազրույցում, որ Ռուսաստանը Հարավային Կովկասում իր գործողությունների կամ անգործության պատճառով հեռանում է Հայաստանից, գրում է «ՌԻԱ Նովոստի»-ն։
«Ռուսաստանը Հարավային Կովկասի անբաժանելի մասն է, Ռուսաստանում ավելի շատ հայեր են ապրում, քան բուն Հայաստանում»,- ասել է ՌԴ նախագահի մամուլի քարտուղարը։
Նա վստահեցրել է, որ Ռուսաստանը Հարավային Կովկասի բացարձակ անբաժանելի մասն է, և շատ հայեր Ռուսաստանի հայրենասեր քաղաքացիներ են և արժանի ներդրում ունեն երկրի զարգացման գործում․ «Ուստի Ռուսաստանը ոչ մի տեղ չի կարող գնալ։ Ռուսաստանը չի կարող հեռանալ Հայաստանից»։
Հիշեցնենք, որ սեպտեմբերի 2-ի երեկոյան հրապարակվել է Փաշինյանի հարցազրույցը իտալական La Repubblica թերթին։ Դրանում նա հայտարարել է, որ Ռուսաստանն ինքը աստիճանաբար հեռանում է Հարավային Կովկասից։
Ավելի ուշ ռուսական դիվանագիտական աղբյուրը «ՏԱՍՍ»-ին հայտնել է, որ ներկայումս փորձ է արվում արհեստականորեն հեռացնել Ռուսաստանին Հարավային Կովկասից՝ օգտագործելով Հայաստանը որպես այդ նպատակին հասնելու միջոց։
Ավելի վաղ Մոսկվան վրդովված էր Ռուսաստանի մասին Փաշինյանի հայտարարությունից։
