Արևելյան գործընկերության քաղաքացիական հասարակության ֆորումի Հայաստանի ազգային պլատֆորմի (ԱլԳ ՔՀՖ ՀԱՊ) համակարգող Հովսեփ Խուրշուդյանը ներկայացրել է իր և ՀԸԳՀ Քաղաքացիական հարթակի համանախագահ Լուսինե Հակոբյանի՝ Եվրասիա համագործակցություն հիմնադրամին հունիսի 6-ին ուղարկած բաց նամակ-հարցումը, որը մինչ օրս որեւէ արձագանքի չի արժանացել։
«ԲԱՑ ՆԱՄԱԿ
Հարգելի պարոն Տեր-Գաբրիելյան
Քաղաքացիական հասարակության դաշտում գործող դրամաշնորհատուների գործունեության գլխավոր սկզբունքներից մեկը թափանցիկությունն ու հաշվետվողականությունն է: Դա նաեւ կանխարգելիչ միջոց է հնարավոր շահերի բախումներից, կոռուպցիայից եւ կուսակցականացումից: Իրենց գործունեության նման թափանցիկություն ապահովում են անգամ այնպիսի դրամաշնորհատու կազմակերպությունները, որոնք թիրախավարվում են Հայաստանում առկա այլատյաց եւ/կամ ռուսաստանյան ազդեցության գտնվող անձանց եւ կառույցների կողմից: Այդ իմաստով մեր տարակուսանքն է հարցուցում այն հանգամանքը, որ չլինելով թիրախավորված նման կառույցների կողմից, «Եվրասիա համագարծակցություն» հիմնադրամը չի հրապարակում/տեղադրում իր կայքում իր ստացած եւ բաշխած միջոցների մասին տեղեկություններ:
Կոչ ենք անում Ձեզ հրապարակել.
- «Եվրասիա համագործակցություն» հիմնադրամից վերջին 10 տարիների ընթացքում ֆինանսավորում ստացած բոլոր ֆիզիկական եւ իրավաբանական անձանց ցանկը՝ ըստ տարիների, նշելով այն ծրագրերը, որոնց շրջանակներում այդ ֆինանսավորումը իրականացվել է եւ տրամադրված ֆինանսավորման/դրամաշնորհի չափը:
- «Եվրասիա համագործակցություն» հիմնադրամին վերջին 10 տարիների ընթացքում ֆինանսավորում տրամադրած դրամաշնորհատուների/ նվիրատուների ցանկը, նրանց տրամադրած գումարի չափը եւ այն ծրագրերի անվանումները, որի շրջանակներում այդ ֆինանսավորումները տրամադրվել են»:
