Բարձրագույն դատական խորրդի անդամ Երանուhի Թումանյանցը 2020 թվականին, որպես փաստաբան, դատարան հայցադիմում է ներկայացրել այդ ժամանակ ՀՀ փոխվարչապետ Տիգրան Ավինյանի և փոխվարչապետի գրասենյակի դեմ։
2020 թվականի նոյեմբերի 2-ին «Թրանսփարենսի Ինեթերնեշնլ հակակոռուպցիոն կենտրոն» (ԹԻՀԿ) հասարակական կազմակերպությունը՝ ի դեմս Սոնա Այվազյանի, պայմանագիր է կնքել փաստաբաններ Դավիթ Գյուրջյանի, Գենյա Պետրոսյանի, Երանուհի Թումանյանցի հետ։
Պայմանագիրը ներառված է Երանուհի Թումանյանցի, որպես ԲԴԽ անդամի թեկնածու, ներկայացրած փաստաթղթերում։
Կատարողները պարտավորվել են․
«1․ Ուսումնասիրել անհրաժեշտ փաստաթղթերը, կազմել և դատարան ներկայացնել հայցադիմում՝ ՀՀ փոխվարչապետ Տիգրան Ավինյանին և նրա գրասենյակին «Թրանսփարենսի Ինեթերնեշնլ հակակոռուպցիոն կենտրոն» հասարակական կազմակերպությանը 01․07․2020 թ․ հարցմամբ հայցված տեղեկատվությունն ամբողջությամբ /ներառյալ հայցված փաստաթղթերը/ տրամադրելու պարտավորեցման պահանջով։
2․ Հարուցված դատական գործի շրջանակում՝ Վարչական, Վերաքննիչ վարչական, Վճռաբեկ և Սահմանադրական դատարաններում ներկայացնել Պատվիրատուի շահերը, մասնակցել դատական նիստերին և կատարել բոլոր անհրաժեշտ գործողությունները, այդ թվում՝ ըստ անհրաժեշտության վերաքննիչ և վճռաբեկ բողոքներ կամ պատասպաններ, Սահմանադրական դատարան դիմում ներկայացնելու, ինչպես նաև գործով անհրաժեշտ ապացույցների ձեռքբերման և ներկայացման հետ»։
Նշված պայմանագրով Թրանսփարենսի Ինեթերնեշնլ հակակոռուպցիոն կենտրոնը Երանուհի Թումանյանցին վճարել է 250․000 դրամ։
Iravaban.net-ը հայտնում է, որ վարչական դատարանը՝ դատավոր Սամվել Հովակիմյանի նախագահությամբ, 2022 թվականի փետրվարի 3-ին վճռել է․
««Թրանսփարենսի Ինթերնեշնլ հակակոռուպցիոն կենտրոն» հասարակական կազմակերպության հայցն ընդդեմ Հայաստանի Հանրապետության կառավարության` 01.07.2020 թվականի հարցմամբ հայցված տեղեկատվությունն ամբողջությամբ, ներառյալ` հայցված փաստաթղթերը տրամադրելուն պարտավորեցնելու պահանջի մասին, մերժել»։
Այս գործով վճիռը բողոքարկվել է Վարչական վերաքննիչ դատարան։ Դատական նիստ է նշանակվել 2023 թվականի փետրվարի 23-ին։
Լուսանկարում՝ Տիգրան Ավինյանը, Երանուհի Թումանյանցը, Սոնա Այվազյանը
