ՌԴ նախագահ Վլադիմիր Պուտինը հեռախոսազրույց է ունեցել ֆրանսիացի գործընկեր Էմանուել Մակրոնի հետ՝ հատուկ ուշադրություն դարձնելով Զապորոժյեի ատոմակայանում տիրող իրավիճակին, հաղորդում է Կրեմլի մամուլի ծառայությունը։ Տեղեկանում ենք РИА Новости-ից։
ՌԴ ղեկավարը տեղեկացրել է ատոմային էլեկտրակայանի պաշտպանությունն ապահովելու համար մասնագետների ձեռնարկած միջոցառումների մասին։ Միաժամանակ նա մատնանշել է ուկրաինացի զինվորականների կողմից այս գոտում մշտական գնդակոծությունները և ընդգծել Կիևի իշխանությունների վրա ճնշում գործադրելու անհրաժեշտությունը։
Նախագահները փոխադարձ պատրաստակամություն են հայտնել ստեղծված իրավիճակի շուրջ ոչ քաղաքականացված փոխգործակցության համար:
Պուտինը Մակրոնի ուշադրությունը հրավիրել է նաև այն փաստի վրա, որ Ուկրաինան արևմտյան զենքի միջոցով նպատակաուղղված գնդակոծում է Դոնբասի քաղաքացիական ենթակառուցվածքը, ինչի պատճառով տուժում է խաղաղ բնակչությունը։
Ինչ վերաբերում է պարենային գործարքին, երկու ղեկավարներն էլ համաձայնել են, որ սեւծովյան նավահանգիստներից հացահատիկն առաջին հերթին պետք է ուղարկվի զարգացող երկրներ։ Վլադիմիր Պուտինն ընդգծել է, որ Եվրահանձնաժողովը չպետք է խոչընդոտներ ստեղծի Աֆրիկայի, Մերձավոր Արևելքի և Լատինական Ամերիկայի երկրներ ռուսական գյուղատնտեսական արտադրանքի և պարարտանյութերի մատակարարման համար։
Պետությունների ղեկավարները պայմանավորվել են շարունակել երկխոսությունը տարբեր մակարդակներում։
