Ղազախստանի Հանրապետության ներքին գործերի նախարարությունից հայտնել են, որ երկրում տեղի ունեցած անկարգությունների հետևանքով՝ իրավապահները ձերբակալել են 3811 մարդու: Այս մասին տեղեկանում ենք ТАСС լրատվական գործակալությունից:
Հաղորդվում է, որ 26 մարդ վիրավորում է ստացել:
Ըստ իշխանությունների՝ հունվարի 7-ի առավոտից հանրապետության բոլոր մարզերում ընդհանուր առմամբ վերականգնվել է սահմանադրական կարգը։ Ամենալարված իրավիճակը շարունակում է մնալ Ալմաթիում:
Հիշեցնենք, որ Ղազախստանում բողոքի ակցիաները սկսվել են նոր տարվա առաջին օրերին։ Ժանաոզեն և Ակտաու քաղաքների բնակիչները բողոքի ցույցերի են դուրս եկել հեղուկ գազի գնի կրկնակի թանկացման դեմ, ինչը Էներգետիկայի նախարարությունը բացատրել է նրանով, որ հունվարի 1-ից էլեկտրոնային բորսայում գները սկսել են ձևավորվել առաջարկի և պահանջարկի հիման վրա։
Նշենք նաև, որ զանգվածային անկարգությունների ֆոնին երկրում արտակարգ դրություն է հայտարարվել:
