«Գովազդի մասին» օրենքով մի շարք արգելքներ են սահմանվում որոշ ապրանքատեսակների գովազդների համար։

Ալկոհոլային խմիչքների գովազդի դեպքերում արգելվում է`

• ներշնչել, որ ալկոհոլն ունի բուժական, խթանող, հանգստացնող և լարվածությունը թուլացնող հատկություններ.
• դրդել սպառողներին ալկոհոլի օգտագործմանը, բացասական գնահատական տալ չափավոր օգտագործմանը կամ չօգտագործմանը.
• ներկայացնել խմիչքներում ալկոհոլի բարձր աստիճանը` որպես դրական հատկություն.
• ներշնչել, որ ալկոհոլային խմիչքներ օգտագործելն էական է բարետես կազմվածք ձեռք բերելու, հասարակական հաջողության հասնելու կամ գրավչություն ստանալու համար.
• նկարահանել և պատկերել 25 տարեկանից ցածր տարիք ունեցող անձանց:

Արգելվում է ալկոհոլային խմիչքների գովազդման ժամանակ դիմել անմիջապես անչափահասներին, ինչպես նաև ցույց տալ կամ պատկերել դրանց օգտագործման ընթացքը:

Արգելվում է զանգվածային տեղեկատվության էլեկտրոնային միջոցներով ժամը 06:00-ից մինչև 22:30-ը ցուցադրել թունդ ալկոհոլային խմիչքների (սպիրտի պարունակությունը 20 և ավելի ծավալային միավոր) գովազդ: Ալկոհոլային խմիչքների գովազդ տեղադրել լրագրերի կամ ամսագրերի առաջին էջի ու կազմի վրա ևս արգելվում է:

Ալկոհոլային խմիչքների գովազդը նշված պահանջների խախտմամբ` առաջացնում է տուգանքի նշանակում գովազդատուի նկատմամբ` 300 հազար դրամի չափով: Նշված արարքները կրկին կատարելը, վարչական տույժի միջոցներ կիրառելուց հետո մեկ տարվա ընթացքում, առաջացնում է տուգանքի նշանակում` նախատեսված տուգանքի կրկնապատիկի չափով: