Վիլնյուսը Կիևին է հանձնել M-577 զրահափոխադրիչների խմբաքանակը․ այս մասին հայտնում է ТАСС-ը՝ նշելով, որ բալթյան հանրապետության պաշտպանության նախարարությունից է ստացվել տեղեկությունը։
«Ուկրաինային օգնելը մեր ռազմավարական նպատակն է: Մեր և մեր դաշնակիցների կողմից փոխանցված զենքերն ու տեխնիկան խիստ բավարարում են Ուկրաինայի ռազմական կարիքները», – նշված է պաշտպանության նախարար Լաուրինաս Կասկյունասի ուղերձում:
Նախարարը հիշեցրել է, որ մարտին Լիտվան Կիևին փոխանցել է 155 մմ տրամաչափի արկեր, ինչպես նաև հատկացրել է 35 մլն եվրո՝ Չեխիայի նախաձեռնության շրջանակում՝ ուկրաինական բանակին զինամթերք տրամադրելու համար։
Վիլնյուսը մշակել է Ուկրաինային ռազմական աջակցություն տրամադրելու ծրագիր, ըստ որի՝ 2024-2026 թվականներին այն կկազմի առնվազն 200 միլիոն եվրո։ Հակամարտության սկզբից Լիտվան Ուկրաինային տրամադրել է 605 միլիոն եվրոյի չափով ռազմական օգնություն։
